Ka jingkynnoh pyrshah ban pynthymmai ïa ka Pinewood Hotel ka dei ban long da ka jingthoh: Sanbor
![](https://mawphor.com/wp-content/uploads/2024/06/pinewoo.jpg)
Shillong, Jylliew 18: U Chairman jong ka Meghalaya Tourism Development Corporation (MTDC) u Bah Sanbor Shullai u la ong ba lada ka don kano kano ka jingkynnoh pyrshah ïa ka tnat ne kaba wan na ki riew shimet kadei ban long lyngba ka jingthoh.
“Kano kano ka jingkynnoh kaba tang da ka ktien kan wanlam sha ka jingshah pan bai mynraiñ khmat naba ka ktah ïa ka dur ka dar jong ka corporation,” ong u Bah Shullai ha ka kyrwoh ha ka sngi baar. Kane ka la long halor ka jingshah kynnoh kaba dangshen kaba dei halor ka jingai kam ha kaba ïadei bad ka jingpynthymmai ïa ka Pinewood Hotel.
U Bah Shullai u la ïathuh ba ka jingjurip lang ïa ka Pinewood Hotel la leh da u Myntri ka tnat Tourism bad u Chairman bad ka Board of Directors jong ka MTDC ha ka 30 tarik u bnai Jymmang, 2024, kaba pyni ïa ka jingïatreilang bad pynïaid lang ïa ki kam hapdeng ka Tourism Department bad MTDC.
U la ong ba ha ka por ba la pynlong ïa ka jingjurip lang la don tang 5 ngut ki dkhot jong ka board bad ka la shai ba ha kane ka jingjurip tang ïa ka kam ban pynpra la shim da ka tnat.
U Bah Shullai u la ong ba ka tnat ka la pynmih ka jingpynshai halor kane ka kam kaba ïadei bad ka jingpynpra kaba la leh da ka department bad la leh ban khmih ïa ka jingneh bad ka jinglong jingman jong ka jingtei kiba da ka dieng kiba don mynta bad ban khmih ïa ki kam babniah jong ka jingtrei.
“Ka DPR na ka bynta ban pynthymmai ïa ka Pinewood Hotel ka dangdon hapoh ka jingpynkhreh hadien yn sa khot ïa ka tender ka ban long ha kaba shit kaba shai bad ïa kane shen ynsa khot noh. Nga kyrmen ba kane ka jingpynshai kan pynjah noh ïa kane ka mat jingkynnoh,” u la ong da kaba bynrap, “Ka All Meghalaya Contractor and Suppliers Association ka la pynpaw ïa ka jingsngewhun hadien ka jingïalang bad u Director ha ka sngi Thohdieng bad la pynshai ruh sha ki bad ïa ka tender yn sa khot da ka tnat hadien ba la mynjur ïa ka DPR da ka sorkar bad ia ka copy jong ka tender sha ka association ba kin shim bynta.”
Shuh shuh, u Chairman ka MTDC u la ong ba ka tnat Tourism ka la long barabor kaba ju kyrshan ïa ka MTDC bad la kwah ban ithuh ïa ka jingkyrshan bad ïatreilang ba la ïohpdiang na ka sorkar jylla lyngba ka Tourism Department.
U la ong ba ki kam jong ka Corporation bad kino kino ki kam ba donkam kiba mih la wanrah barabor sha ka Board of Directors jong ka Corporation da MD, MTDC ha ki jingïalang ka Board kiba la ju pynlong shisien ha ka 3 bnai kaba long kaktum ka Companies Act.