Ka jingkylliang shuki Myntri kam dei shuh kaba phylla, ka ju jia ha baroh kawei ka Ri

Shillong, Nailur 24 : U Symbud Myntri Rangbah ka Jylla, Bah Prestone Tynsong u la ong ba ka jingkylliang shuki Myntri kaba dang shu dep shen ha ka jylla kam dei shuh kaba dang thymmai ne kaba phylla hynrei ka dei ka kam kaba ju leh man ka por bad ka dei kaba ju leh ruh ha ka ri baroh kawei.
“Ka jingkylliang shuki Myntri kadei kaba ju leh na ka por sha ka por bad kylleng ka ri India ki ju leh ïa kane. Kumta kam dei shuh ka kam kaba dang thymmai,” ong u Bah Prestone haba kren bad ki lad pathai khubor ha kane ka sngi Balang da kaba pynpaw ruh ba ka jingkylliang shuki Myntri ka dei ka kam ba leh hi da u Myntri Rangbah ka Jylla Conrad K Sangma.
“Ngi ieh bad shaniah beit ha ka jingstad jong u Myntri Rangbah namar kane ka dei ka bynta jong u kum u Myntri Rangbah kumjuh na ka bynta ka party NPP jongngi,” u la ong.
Haba ïadei pat bad ki party ba treilang ha ka sorkar synrop, u Bah Prestone u la ong ba ka NPP ka burom ïa ka rai kaba ki kynhun synrop ki shim.
“Ngi shaniah ha ka rai jong ki party jong ki, ïano ki kwah ban pynhiar shuki bad ïano ki kwah ban pynrung thymmai lane ban pynshong ha ka shuki Myntri,” u la bynrap biang.
Shuh shuh u ong ruh ba watla kin don kito kiba shah pynhiar shuki kiban sngewsih, u Bah Prestone u ong pat ba kane kadei ka sienjam kaba la shim na ka bynta ka jingmyntoi jong ka jylla.
“Kano kano ka rai kaba shim da ka party lane da u Myntri Rangbah ka dei beit na ka bynta ka jingmyntoi jong ka jylla baroh kawei,” u la ong.
Lah ban kdew hangne ba ha ka jingkylliang shuki Myntri dang shen ki la don haduh phra ngut ki Myntri sorkar kiba la shah pynhiar shuki bad phra ngut kiwei pat kiba la ïoh ban shimti thymmai ïa ka shuki Myntri.