K a jylla Meghlaya ryngkat bad kiwei pat ki jylla jong ka thaiñ shatei lammihngi, ki la mad ïa ka jingshit ha kine ki khyndiat sngi baladep, kaba ki record ki ong ba kadei ka jingshit kaba khluit tam jong une u Nailur. Shisha ki paidbah ruh ha kylleng kylleng ki jaka ki la ïa ud ïa kane ka jingshit bad ka jingkhluit ka mei mariang, kaba lehse kim ju kham mad haba la poi u Nailur.
Ka pyrthei naduh katto katne snem ka la ju ïakren halor kata ka Climate Change, ka Global Warming bad kiwei kiwei de ki jingjia kiba ktah ïa ka mariang bad ka jingim u briew hangne ha sla pyrthei. Lehse lada ïakren ia ka jingkylla ka jinglong ka mei mariang ba ka jingnang kiew ka jingshit ki bun ki daw bad ka jingbatai ki stad saian kiba sngewthuh bha shaphang ka jinglong ka mariang kan eh palat ïa u luk u lak ban sngewthuh. Hynrei kiba bun ruh kin sngewthuh ba ka daw ba kongsan hi kaba long ka daw jong ka jingkylla ka mei mariang bad ka jingnang khluit ka mariang kadei ka jingleh hi u khun bynriew.
U Blei haba U thaw ïa ka pyrthei u la buh ïa u khun bynriew ban ri ban sumar bad ban peit ïa ka mariang kaba mut ba u briew um dei ban long ka daw ïa ka jingjulor ka mariang kum ki dieng ki siej, ki lum ki wah, ki um bad kiwei pat ki jingthaw kiba don hangne ha sla pyrthei, namar ba u briew u long u paralok ba ïajan tam bad ka mei mariang.
Pynban katba nang mih ki sngi, u briew ha ka jingbym salia bad bym sngewthuh ïa ka jingkordor ka mariang bad ka jinglalot palat u la lehbeiñ ïa ka mariang da kaba pom pathar ïa ki dieng ki siej, kiba long ki jingthaw kiba U Blei la buh ban ïoh ïa ka lyer kaba khuid, ban pynpyngngad ïa u briew. Nangta ka lyer kaba mih na ki khlaw ki btap ka ïarap ruh ban pynkhuid ïa ka haw haw. Nalor ba u briew u pom pathar ïa ki dieng ki siej, u pynajoh ruh ïa ka mei mariang da kaba bret plastik kat haba lap, da kaba bret jaboh ha ki wah, da kaba tih bad pyntwa ïa ki lum ki wah. U lalot spah da kaba seng ïa ki karkhana kiba pynmih ïa ki tdem kiba jaboh. Ñiuma, ka jingpom dieng, ka jingtih ïa ka khyndew ka shyiap, ka jingtih maw, ka jingseng ïa ki karkhna kadei shi bynta na ka kamai kajih bad aikam aijam ïa u briew. Hynrei haba u la leh palat bad kwah spah palat pat ka kyrtoh kylla sha ku briew hi.
La ju ïohi ba ha ki jaka ba jur u thah, ka jingdon kata kaba ki ong ka jingum jong kit hah namar ka jingkhluit bad ka jingshit ka mariang. Ka jingtwa jong ki lum thah kaba wanrah ïa ka jingshlei um, ka jingjaboh bad jong ki wah kaba wanrah ka jingshlei um bad kiwei kiwei de ki jingpynjot. Ka don ruh ka jingïakren ïa ka jingnang duna jong u slap namar ka jingduna jong ki khlaw ki btap bad kiwei kiwei pat ki daw.
Namarkata ka daw u briew ha kane ka pateng ba mynta u hap ban pyrkhat jylliew, kaei kaban mih na kane ka jingnang jur ka jingshit, ka jingnang khluit ka mei mariang ne kaba ki ju kham ong ka nang khluit ka pyrthei. Ki stad ba peit ïa koit ka khiah, ki ong ba ka jingnang jur ka jingshit ka wanrah bad ka pynkha ïa kai jingpang ba bun ka jait. Ka jingïoh pang ki briew ha kine ki sngi kiba mynta ki long ki dak ki shin n ka jingkylla ka mariang. Ei ban poi pyrkhat ba ha une u bnai uba la sdang ban beh ka lyer synrai kaba pynngad ka wan pynban ka jingshit kyrang, kaba ki briew kim lah shah, kim lah ban trei jingtrei.
Ki bor dorkar ki lah ban ban pynmih ki aiñ, ka lah ban pynmih bun ki kyndon, hynrei lada kam don ka jingkylla na ki briew kan long kaba eh ban teh lakamïa ka jingkylla ha ka mariang. Namar kane baroh ka shong ha uwei pa uwei u nongshong shnong jong kane ka pyrthei. U briew Udei ban kynmaw ruh ba haba U Blei U la buh ïa u briew ban long u nongsumar ïa ka mariang, lada ma u hi u kylla u nongpynjor, ka mariang kan kylla long ka nongpynjot kylla ïa u briew.
