Shiphew snem hadien ba u Myntri Rangbah duh Modi u la shimti ïa ka kam ha u snem 2014, ka kam rep ha u snem 2025 ka la kylla dur, na ka rukom treikam kaba shisien ka la paw da ka jingduna ka jingseisoh, ka jingbymthikna jong ka dor bad ka jingshaniah ha ki mar kiba wanrah nabar sha ka jingmih kaba thaw rekod, ka ïoh ka kot nong jong ki nongrep kaba la pynthikna, ka jingsaiñ dur thymmai katkum ka jingstad saïan bad ka jinglah kyrshan dalade kaba jrong samoi.
Kaba pynlong ïa u snem 2025 kaba kongsan kam dei tang kawei ka skhim ne ka jingkheiñ jingdiah, hynrei ka jingpynïasoh lang ïa ki khatwei snem jong ka jingpynkylla sha ka jingtei ïa ka rep ka riang kaba ïadei bad kaba la pynkhreh na ka bynta ka lawei.
Na ka jingphiah sha ka jingpeit bniah
La sdang ha u snem 2025, ka Pradhan Mantri Dhan-Dhaanya Krishi Yojana (PMDDKY) ka la pyni ïa ka jingkylla sha ka jingpynkylla ïa ka rep ka riang kaba la buh thong, kaba pynshong nongrim ha ka jingmih. La pynbna ha ka mang tyngka 2025-26 jong ka sorkar pdeng bad la mynjur da ka Kynhun Myntri Sorkar Pdeng ha u bnai Naitung, kane ka skhim ka phaikhmat sha ki 100 tylli ki district kiba duna ka jingtreikam bad ka thmu ban ai jingmyntoi ïa 1.7 klur ngut ki nongrep, da ka jingpynlut kaba T. 24,000 klur shisnem ban pynbeit ïa ka jingduna ka jingseisoh, ka jingeh ha ka liang ka um bad ki jingduna ha kaba ïadei bad ka ram.
Da kaba pynïasoh lang ïa 36 tylli ki skhim ba ïadei bad ka rep ka riang ha kylleng ki 11 tylli ki tnad, ka PMDDKY ka bujli ïa ka jingpyntreikam kaba la phiah da ka jingïatreilang ha ki distrik. Da ka jingpynshlur jong ka ADP, ka buh hakhmat eh ïa ka jingai um, ka jingbuh ïa ki mar rep, ka teknoloji, ka jingai jinghikai bad ka jingai ram na ki jaka treikam, kaba pyni ïa ka sienjam sha ka jingkylla ha ka rep ka riang ha ka rukom treikam mission mode bad ka Atmanirbhar Bharat.
Ki dai: Ka Jingkiew sha ka jinglah kyrshan dalade
Ha u snem 2025, ka India ka la sdang ïa ka Mishon na ka bynta ka Aatmanir bharta ha ki dai ban pynduna ïa ka jingshaniah ha ki mar kiba wan nabar, da ka jingpynlut kaba T.11,440 klur. Ka thong ka thmu ban pynmih 350 lak ton ki dai bad 310 lak hektar ka jingrep shuwa u snem 2030-31.
Ha ka sien kaba nyngkong, ki nongrep kiba rep ïa u tur, u rad bad masoor ki ïoh ïa ka jingpynthikna 100% ka jingthied ha ka MSP na ka bynta saw snem, ba la kyrshan da ka jingsam ïa ki symbai ba bha bad ba bun. Da kaba ai jingmyntoi haduh 2 klur ki nongrep, ka mishon ka pynskhem ïa ki jinglong jingman, ka pynskhem ïa ka ïoh ka kot bad ka kyntiew ïa ka jingshngaiñ ha ka jingïoh ïa ka bam kaba tei, kaba pyni ïa ka sienjam kaba kut jingmut sha ka jinglah kyrshan dalade ha ki dai.
Ka jingpynkhlaiñ ïa ka jingïadei hapdeng ka kam rep bad ki karkhana: Ka Cotton Mission
Ka Cotton Mission kaba san snem, kaba la pynbna ha ka Mang Tyngka 2025-26 jong ka sorkar pdeng, ka pynleit jingmut ha kaba kyntiew ïa ka jingseisoh, khamtam ha u cotton ba jrong, lyngba ka jingkyrshan ka science bad ka teknoloji na ka bynta ki nongrep.
Da kaba pynthikna ïa ka jingpynbiang kaba thikna ïa u cotton uba bha, ka mishon ka pynkhlaiñ ïa ka kam shna jaiñ jong ka India, ha kaba 80% na ka bor treikam ka dei kaba la wan na ki MSME, bad ka pynskhem ïa ka jingthmu jong ka 5F ban pynïasoh ïa ki jaka rep sha ki ïew jong ka pyrthei, kaba pynlong ïa ka rep ka riang kum ka nongpynïaid ba kongsan jong ka jinglah ïakhun ha ki karkhana.
Ka Jingpynmih kaba thaw Rekod: Ka Jingmih na ka Shiphew snem jong ka Jingpynkylla
Ka jingktah jong kine ki jingjied polisi ka la paw shai ha u snem 2025. Ka India ka la ïoh ïa ka jingpynmih mar bam kaba heh tam ha ka histori kaba long 357.73 million ton ha u snem 2024-25, kumba la pyllait da ka Tnad ka rep ka riang ha u Naiwieng 2025.
Kane ka pyni ïa ka jingkiew kaba palat 106 million ton haba ïanujor bad u snem 2015-16, ha kaba ka jingpynmih ka long haduh 251.54 million ton, ka jingkiew kaba heh tam ha kine ki shiphew snem ba la dep.
Ki mat ba kongsan ba la pynbna ha u snem 2025 ki kynthup ïa: Ka jingpynmih khaw ha ka rekod kaba 1,501.84 lak ton. Ka jingmih jong u kew kaba 1,179.45 lak ton, da ka jingkiew kaba heh tam na u snem sha u snem ha ki por ba dang shen.
Ka jingpynmih ïa ki dai kaba la poi sha ka 256.83 lak ton. Ki oilseed kiba kot sha ka rekod kaba 429.89 lak ton. Ha ka lai bnai ba nyngkong jong u snem 2025, ka kam rep jong ka India ka la kiew da 3.7%, kaba la buh ïa ka hapdeng ki ri kiba kiew stet tam ha ka ïoh ka kot na ka rep ka riang ha ka pyrthei , ka jingmih kaba pynpaw ïa ka jinglong shngaiñ ba la ïoh hapoh ka jingïalam jong u Myntri Rangbahduh Modi.
MSP: Na ka jingkular Policy sha ka jingïada ïa ka ïoh ka kot
Ka nongrim kaba kongsan jong kane ka jingkylla ka la long ka jingpynkhlaiñ ïa ka Minimum Support Price (MSP). Ha shuwa u snem 2014, ka MSP bunsien ka sah kum ka dak namar ka jingduna ka jingthied. Hapoh ka jingïalam jong u Myntri Rangbahduh u Modi, la pynskhem ïa ka MSP kum ka lad jingïada ïa ka ïoh ka kot kaba seisoh.
Ha u snem 2025, ka sorkar ka la mynjur ïa ki MSP ba la pynbha na ka bynta 14 tylli ki jingthung Kharif bad baroh ki jingthung Rabi ba la bthah, da kaba bud pyrkhing ïa ka nongrim ban buh ïa ka MSP ha ka dor kaba 1.5 shah ïa ka jinglut ha kaba pynmih.
Ka jingïanujor kaba la neh shiphew snem ka long kaba shai: Ka jingthied khaw (2014-15 haduh 2024-25) ka la poi sha ka 7,608 lak metric ton, haba ïanujor bad 4,590 LMT ha ki phew snem ba la dep. Ka jingsiew MSP sha ki nongrep kba ka la kiew sha ka T.14.16 lak klur, palat lai shah ïa ka pisa ba la siew shwa u snem 2014. Ka jingsiew MSP baroh na ka bynta 14 tylli ki jingthung Kharif ka la poi sha ka T.16.35 lak klur, haba ïanujor bad T.4.75 lak klur mynshwa .
Shuwa u snem 2025, ka MSP ka la nang kiew na ka jingpynbna sha ka jingkular ha ka ïoh ka kot kaba lah ban shaniah na ka bynta ki nongrep.
Ka Saïan bad ka jingpynneh pynsah ha ka tynrai
Ha u snem 2025, ka India ka la long ka ri kaba nyngkong ha ka pyrthei ban shna bad pyllait ïa ki jait kba ba la pynkylla ïa ka genome, kaba la pynlong ïa ka ri kaba nyngkong eh ha ka pyrthei ha ka liang ka jingstad science ha ka rep ka riang.
Ki ar jait u kba DRR Dhan 100 (Kamala) bad u kba Pusa DST 1, ki ai ka jingmih kaba kham bun, ka jingheh kloi bad ka jinglah ban shah ïa ka jinglong mluh bad ka bor jong ka um ban pynkhuid ïa ki jaboh ha ka khyndew. La khmih lynti ba ka jingrep ha ka jaka ba la ai jingmut kan pynmih 4.5 million ton shuh shuh u khaw, pynduna ïa ka jinglut ha kaba pynmih bad kyntiew ïa ka jinglah ban shah ïa ka jingkylla ka suiñbneng.
La ban jur kumjuh ïa ka jingpynneh pynsah. Ka jingbuh jong ka Maharashtra ïa 45,911 tylli ki pump rep ba pyndonkam da ka solar ba lait na ka grid tang hapoh 30 sngi, kaba la ithuh da ka Guinness World Records ha u snem 2025, ka dei ka dak jong ka jingkylla stet jong ka India sha ka rep ka riang kaba khuid.
Ka rep ka riang kum ka jingthmu ba kongsan jong ka ri.
Ka jingbei tyngka paidbah ka pyni ïa kane ka jingthmu ba kongsan. Ka jingmang tyngka na ka bynta ka Tnad ka rep ka riang bad ka bha ka miat jong ki nongrep ka la kiew bha, na ka T.21,933.50 klur ha u snem 2013-14 sha ka T.1,27,290.16 klur ha u snem 2025-26, kaba pyni ïa ka jingbuh hakhmat eh ïa ki nongrep hapoh ka sorkar jong u Myntri Rangbahduh Modi.
Ka Jingpynkut: U snem 2025-Ka snem jong ka jingskhem na ka bynta ki nongrep na India.
Ka snem 2025 ka ïeng kum ka jingkut jong ki shiphew snem jong ka jingpynkylla ïa ka rep ka riang hapoh ka jingïalam jong u Myntri Rangbah duh Modi. Ka la pyni kumno ka polisi kaba ïaid beit, ki dor kiba thikna, ka jingsaiñdur thymmai jong ka science bad ka jingsynshar kaba ïatylli ka lah ban tei pat ïa ka jingsngew skhem ha ka rep ka riang.
Naduh ka jingpynmih mar bam kaba la thaw rekod bad ka MSP kaba la pynkhlaiñ haduh ki mishon kiba wanrah jingkylla kum ka PMDDKY bad ka Aatmanirbharta ha ki dai, ka rep ka riang jong ka India ha u snem 2025 kam long shuh kaba paw namar ka jinglong kaba kham don jingma. La batai ïa ka da ka jingskhem, ka jinglah kyrshan dalade bad ka jingangnud-kaba ïahap bad ka jingthmu jong u Myntri Rangbahduh na ka bynta ka Atmanirbhar Bharat bad ka Viksit Bharat.
