Ka jingkut jingmut ryngkat ka jingtreishitom ka long kaba kongsan tam: Bah HS Diengdoh

Mawkyrwat, Ïaïong, 07: Ka Pyndendiwah R.C. Secondary School, Pyndendiwah ka la ïoh ban plie ïa lympung ïalehkai jong ki khynnah ka ‘AnnualSchool Sports Meet 2022’ ha madan jong ka Shnong Pyndendiwah, South West KhasiHills District, ha kaba u SDO jong ka Ranikor Civil Sub Division (ba la shongthait), bah H. Staline Diengdoh, MCS, u la long kum u kongsan.
Ha kane ka ‘Annual School Sports Meet 2022’ ki don baroh saw tylli ki kynhun kata ka Red House, ka Blue House, ka Green House bad ka Yellow House ha kaba ki khynnah skul ki la ïa shimbynta shitrhem bha. Ha kaba sdang eh, ki khynnah skul ki la ïoh ban pyni bad pyndep ïa ka March Past bad March Drill ba la shim salute da u kongsan ha ryngkat ka jingsynranglang jong ki nonghikai.
U bah H. Staline Diengdoh, haba kren kum u kongsan ha ka jingplie pyrda ïa ka Annual School Sports Meet 2022 jong katei ka skul, u la ong ba ka jingïashimbynta shitrhem jong ki khynnah skul ka pynkynmaw ruh ïa ki 40 snem ba mynshwa ha ka por ba u dang leit skul kum ma ki bad ha ka liang ka kam ïalehkai hapoh skul u ju sngewtynnad eh tang ha ka March Past bad March Drill.
Haba kren ai mynsiem na ka bynta ki khynnah skul ha kaba ïa dei bad ka pule puthi, u la ong ba kum ki khynnah skul ki dei ban long kiba minot, treishitom bad don ka mynsiem jong ka jingïakhun ha kiba bun ki bynta khnang ba ka thong bad ka lawei jong ki kan long kaba phyrnai namar ki im ha kine ki sngi jong ka jingïakop la ha kano kano ka bynta ne kajingïaleh. U la pynkynmaw ruh ba kum ki khynnah skul ki dei ban shim ïa ki nonghikai ba ki dei ki kmie ki kpa kiba ar ha ka jingim, namar ki ju ïa kynduh ïa ki jan manla ka sngi ha ki jakapule jong ki.
Ha kaba ïadei bad ka kam ïalehkai, u la pynkynmaw ba ka jingïalehkai ka dei kawei na ki bynta ba kongsan ha ka jingim namar ka ai ha ki ïa ka met kaba koit ba khiah, ka ai ki jingmut jingpyrkhat bad ka jabieng kaba khlaiñ, namar haba ïalehkai ka met ka phad ka khih ka ksar, ki thied ki jaw, ki dohksah ruh ki shait ki khlaiñ.
Haba kren ha kaba ïa dei bad ka jinglong jingman ha kine ki sngi, u la ong ba haba pyrkhat ïa ka jingpule ka la long kaei kaei kaba sngewsynei bad pyndiaw mynsiem, khamtam eh haba phai sha ki nonghikai kiba long ki nongprad lynti ïa ka jingim jong ki khynnah lyngba kiba bun ki jaid jinghikai ha ki jaka pule namar ban ïa nujor bad kiwei de ki jaid kam kum ka kam sorkar ha kaba lah ban ong shi kyntien ba ki nongtreikam sorkar ki bit ki biang ka jingsiew, katba ka jingsiew ïa ki nonghikai ka duna bad ki dei ruh ki nongtrei kiba shah jynjar tam ha kane ka Jylla Meghalaya. Hynrei wat hapdeng kita kiei kiei baroh ki jingeh ba ki ki ïa kynduh, kum ki nonghikai ki long da shisha kita ki nongtrei kiba la aiti met bad mynsiem na ka bynta ki hep kiba rit bad ki samla pule ba kin long ka lawei jong ka ri bad ka jaidbynriew.
Lah ban kdew ruh ba ka jingdon bun jong ki skul ha kine ki sngi, ka lah ban long ka jingeh na ka bynta ki nonghikai ha kaba kim da ïoh shuh ïa ka jingsiew kaba biang, ka jingbym ïoh biang por jong ka jingsiew hynrei hapdeng kine ki jingeh watla kita kiba shim ïa ka jingkitkhlieh (kum ki nongmihkhmat ne ki myntri sorkar) kiba don ha ka bor ban peit ruh ki long kiba duna, hynrei kum ki nonghikai kim shym la kynran dien ban ai ka jinghikai kaba bha ïa ki khynnah skul.
U la pynkynmaw ruh ba ka jingbun jong ki khynnah pule kam don dor ei ei lada ka jingai jinghikai kam long kaba bha. Namarkata, u don ka jingkyrmen ba napdeng jong kine ki khynnah pule kin sa mih shibun ki ‘riew khraw ha ki sngi ki ban sa wan lyngba ka jingïatreilang jong ki nonghikai, ki kmie ki kpa bad kumjuh ruh jong ki khynnah skul.
U babu H. Jyrwa, uba dei u Headmaster jong ka Pyndendiwah R.C. Secondary School, Pyndendiwah, u la pynkynmaw ïa ka jingsdang jong ka skul naduh Upper Primary ha u snem 1992 katba ïa ka Secondary pat dang sdang ha u snem 2004 ha kaba kum ka skul mynta ka la dap kum 18 snem ei ei, hynrei na ka liang ka skul haduh mynta ka dang sah ieh shadien ha ki liang baroh.
U la ïathuh ba ka naduh u snem 1992 haduh mynta kane ka skul ka dang don shibun bah ki jingdonkam bad ki jingpynbha namar kane ka skul kam pat ïoh jingïarap ei ei na ki nongmihkhmat lait noh tang na kawei ka skhim ba la ai da u MLA ba la khlad noh jong ka Laban Constituency na Shillong. Namarkata, wat hapdeng kita ki jingeh hynrei kum ki nonghikai kim shym la ran dien bad ki ïai kyntu na ka bynta ki khynnah skul ba wat ai ba ki kam jong ki kin kut noh tang ha kane ka madan lyngba ki kam ïalehkai hynrei ba kin kiew ruh ha kiwei ki bynta kum ha ka trei ka ktah, ka rwai ka shad, ka put ka tem, ha ki kot ki sla bad ha ka pule dangle.
Ïa kane ka sngi la pynphuh pynphieng daka jingrwai pdiang na i khynnah skul ka Pyndendiwah R.C. Secondary School, ka jingshad na ki khynnah skul jong ka Pyndendiwah R.C. English Medium School.
Ïa ka jingïalang la pynïaid da ka B. Jyrwa kaba dei ka nonghikai jong ka Pyndendiwah R.C. Secondary School bad ka jingkren lyngkot na u Myntri Shnong jong ka Pyndendiwah, bah S. Jyrwa bad kajingkren khublei na ka kong P. Jyrwa.