Shillong, Naiwieng 05 : U nongïalam jong ka National People’s Party (NPP) uba dei ruh u Symbud Myntri Rangbah ka Jylla u Bah Sniawbhalang Dhar u la kyntait ïa ki jingkynnoh ba ki jylla ka thaiñ shatei lammihngi jong ka Ri kin thaw noh tang kawei ka seng saiñ pyrthei, da kaba pynksan ruh ba ka shap ‘Kot’ jong ka party kan bteng beit ban neh kumjuh.
Ha jingïakren bad ki lad pathai khubor ha ka sngi Balang, u Bah Sniawbhalang u la pynpaw ïa ka jinglyngngoh halor katei ka jingkynnoh, da kaba ong, “Katei ka dei ka shap jong ngi, ka Kot, balei kan kylla? Mano ba la ïathuh ïa phi? Ka jingkulmar ka dei na ka bynta kiwei ki party hynrei ym na ka bynta ka party jong ngi.”
U la bynrap ruh ba ka dang kloi than ban ïakren ïa ki jingkylla kiba lah ban wan bad ong ruh ba ka party kan dang ïai bteng ban long shi bynta jong ka North Eastern Democratic Alliance (NEDA) ïa mynta.
Nangta haba kren pat halor ka shuki MP ha Rajya Sabha, u Bah Sniawbhalang u la ong ba kam don pat satia kano kano ka jingiakren haba ïadei bad katei ka mat namar ka party ka burom ïa u MP ba mynta nalor ba u la dei u dkhot uba la rim tam.
“Ngin rai lang halor kane, wat khuslai ha ka party jongngi, ngim ju rai marwei hynrei ngi shim lang ïa ka rai jong ki nongïalam ba la rangbah bad ïatai sani lang shwa,” u la ong.
