Ka jingkren kulmar halor ka jingshimbynta ki bar jylla ha elekshon MDC ha GHADC kan pynkhihwin ïa ka rilum Garo : Bah Ardent

Shillong, Rymphang 18 :U Nongïalam ka VPP bad MLA ka Nongkrem u bah Ardent Basaiawmoit u la maham ïa ka jingkren kulmar ka sorkar kaba ong ba la shah ïa ki bar jylla ban ïashim bynta ha ka election MDC sha ka GHADC da kaba u kynnoh ka dei ka jingbym ïohi jngai ki nongïalam na ri lum Garo bad kan buh ruh ïa ka thaiñ ha ka jingma kaba khraw.
“Kaei kaba ngi kren ka pynpaw shabar ïa kaei kaba don hapoh ka jingmut jingpyrkhat bad ka dohnud jong ngi. Haba ki nongïalam kiba don ha ka sorkar ki ong ba ki bar jylla ki lah ban ïashim bynta ha ka election MDC ka pynpaw ïa ka jingmut jingpyrkhat ba shapoh jongki. Hato ki tip kaei ka ban jia hadien habud” ong u bah Ardent haba ïashim bynta ha ka jingïatai nia halor ka jingkren maitphang u Lat halor ka Dorbar mang tyngka..
U bah Ardent uba leit sha ri lum Garo dang shen u la ong ba ka thaiñ ka don hapdeng ka jingma bad kiba kum kine ki jingkren kulmar na ka liang ka sorkar ka lah ban dang wanrah ki jingïapher jingmut bad ktah ïa ka jingmut jingpyrkhat ki briew kaba lah ban poi shaduh u pud bym lah tehlakam shuh ïa ka suk ka saiñ.
“ Ka jingshah pyniap jong u D Sangma kam dei kaba shu jia ryngkhat. La ïathuh ïa nga da u kpa jongu ba kim don jingshngaiñ shuh katba ym pat ïoh kem ïa ki arngut ki briew. Nga kyntu jur ïa ka sorkar ban thwet jur ïa u s Hoque bad ïa u Hussain bad pynngat ïa ki ha ki kyndon ba pyrkhing jongka aiñ”. U la kynnoh ba ka jingshah pyniap jongu ka dei ka jingpynhiar kput da ki nongrahbor namar u Sangma u la ïoh ban pyllait im ïa ka para jongu na kti jongki.
U bah Arent u pynpaw ka jingsngewkhia jur halor ka jingduk jingkyrduh jongkatei ka long ïing bad kyntu ïa ka sorkar ban leh ei ei na ka bynta jongki.