Mairang, Nailar, 02: Ka District Sankalp Hub for Empowerment of Women Eastern West Khasi Hills District, ka la pynlong ïa ka awareness programme, halor ka jingkoit ka jingkhiah jong ki khun kynthei bad ka jingsam ïa ka sanitary pad vending machine sha ki Laiphew tylli ki skul bad college kiba hap hapoh ka Eastern West Khasi Hill District mynta ka sngi.
Ïa kane ka program ba la pynlong ha Multipurpose Hall, DC’s office Mairang. Kane ka Program ka dei shi bynta jong ka Beti Bachao Beti Padhao scheme, ha kaba ka Deputy Commissioner, Smti A. Kharpor, IAS kum ka kongsan ka la plie ha ka jingdonlang jong I Dr. M.Pala, Medical Officer, Bah P.S Marwein DSP, Kong D.Pakyntein DSWO bad kiwei, kynthup ki khynnah skul bad khynnah college, ki principal bad ki nonghikai na ki skul bapher bapher jong ka district.
Ka kong D.Pakynteiñ, DSWO ha ka jingkren lamphrang, I la ong ba ka Beti Bachao Beti Padhao (BBBP) Scheme ka dei ka central scheme ba la plie paidbah da ka Ministry jong ka sorkar pdeng ha ka 22 tarik K’lyngkot 2015, ban khmih halor ka jinghïar ka jingdon ki khun kynthei ba dang kha hapoh ka ri.
Nangta ban dang pynbun shuh shuh ïa ka jingdon ki jaka kha khunlung, ban dang pynbun ïa ka jingdon ki khun kynthei ha ki jaka pule (secondary education level), ban pynshlur ïa ki khun kynthei bad ki longkmie ban trei lyngba ki sap kiba ki don. Ban pynduna ïa ka jingdon ki khun kynthei kiba pep skul bad ruh ban batai pynsngewthuh ïa ki khun kynthei ha ka ba ïadei bad ka jinglong jingman ha ka met bad ka jingkoit jingkhiah jong ki.
Ka Deputy Commissioner, kong A.Kharpor IAS ha ka jingkren, ka la ïaroh ïa ka sienjam ba la shim da ka office jong ka DSWO, ha ka ban pynlong ïa ka program ka ba ai jingmyntoi shibun eh khamtam ïa ki khynnah skul kynthei kiba dang kynjoh ban heh ban san.
Ka skhim Beti Bachao Beti Padhao (BBBP) kam dei tang ba ka khmih ïa ka jingdon ki khun kynthei ba dang kha, hynrei ka peit ruh ïa ka liang ban ai jingsumar ïa ki khun kynthei bad ïa ka koit ka khiah jong ki. Kane ka program ka ïarap ban kyntiew ïa ka koit ka khiah jong ki khun kynthei, ka hikai ruh halor ka jingdonkam ban sumar khuid ïalade ban lait na ki jingpang.
Ka la kyntu ïa ki khynnah skul kiba long ka lawei jong ka district, ka jylla bad ka ri ba ki dei ban ieit ïalade da ka ba ki sumar khuid ïa la ka met, ban don ruh ïa ka jingkitkhlieh na ka bynta ka lawei jong ki, ym ban shu shah pynthame ki jingmut jingpyrkhat hano hano.
Ha kane ka sngi na ka liang ka Deputy Commissioner bad kiwei kiba shah khot sngewbha, ki la sam ïa ki sanitary pad vending machines sha palat Laiphew tylli ki skul bad college kiba hap hapoh ka Eastern West Khasi Hill District.
