Ka jingkoit jingkhiah ka thong ba hakhmat eh jong ka Sorkar Meghalaya: Conrad

Shillong, Naiwieng 07 : U Myntri Rangbah ka Jylla Conrad K Sangma u la ong ba ka sorkar ka la buh hakhmat eh ïa ka jingkoit jingkhiah da kaba shim ruh ïa ki buit treikam bapher bapher ban peit ba ka kam ai jingsumar kan long kaba paka bad kaba janai hapoh ka jylla. ïa kane u la kren mynta ka sngi Ba-ar, haba plie paidbah ïa ka North East Summit ban ïamir jingmut ki doktor na kane ka thaiñ kumno ban rat dyngkong ïa ka jingpang TB, ha ka jingïalang kaba long ha Courtyard Marriot.
Haba kren ha ka jingïalang, u Myntri Rangbah ula ong ba ka kam sumar sukher ka dei ka kam ba hakhmat eh jong ka Sorkar. “Ha kine ki khyndiat snem ba la leit, ngi lah bunkam bad kynshew bha ha ka kam jong ka koit ka khiah bad shim ruh ïa ki buit treikam bapher bapher ban pynthikna ïa ka jinglong janai ha ka kam sumar sukher ha Meghalaya” ula ong.
U Myntri Rangbah ula pyntip ruh ïa ka jingpynkiew bunshah ïa ka bhah mang tyngka jong ka Sorkar Jylla sha ka koit ka khiah bad bynrap “Kaba bun na kane ka song pisa ka la leit sha ki mission ai jingsumar bad ruh sha ki Health & Wellness Centre kiba la ïarap shikatdei eh ban pynjanai bad pynïoh ïa ki lad sumar sukher kiba janai ha ki jaka sumar ka Sorkar”.
Haba kren ba kumno ka jingtreikam jong ki Kynthei ha ki Self Help Group bapher bapher ka la nang aibor ïa ki ha ka ïoh ka kot, kaba nang pynbha pat ïa ka koit ka khiah, u Myntri Rangbah ula ong “Ka jingïadei hapdeng ka koit ka khiah bad ka ïoh ka kot ka dei kaba lah ban thew lyngba ka jingpynïapher halor ki kam ka koit ka khiah kum ka jingiap ki briew, ka jingiap ki khunlung ba dang kha bad kiwei kiwei”ula ong.
U Myntri Rangbah ula ong ruh ba ka ïoh ka kot jong ki briew ka dei u mawbyrsiew ba kongsan eh jong ka jingroi ha ka ïoh ka kot. Ula kren ruh halor ka jingdon jingiadei hapdeng ka koit ka khiah bad ka jingkiew ka ïoh ka kot.
U Myntri Rangbah ula pyntip ruh ba ka don bun ki khep halor ka jingslem ban sumar ïa ka jingpang TB khamtam hapdeng ki longïing kiba duk ki bym shym la leit sha ki doktor tad haduh da ki la shitom jur.
“Ka jingïashim bynta lang ki Shnong ki thaw, ka jingpynïoh ïa ka bam ba tei met, ban wanrah ïa ki buit ai jingsumar, ka jingpynshai halor ka jingpang, ka jingleh screening dang kloi bad ka jinglehkhuid bad kiwei kiwei, ki dei katto katne ki sienjam kiba lah ban pynsted ïa ka thong ban lah pynlong ïa ka India kaba lait naka jingpang TB hapoh u 2025” ula bynrap.
U Myntri Rangbah ula kyntu ïa ki kynhun bapher bapher kiba don ha ka Tnad ka koit ka khiah ba kin nang ïai bteng ban treikam da ka jingthmu, ka jingkut jingmut bad ka jingtrei shitom. “Ngim dei ban kylla long ka Sorkar ba shu ai skhim bad prokram hynrei kaba lah ban leh eiei na ka bynta ki paidbah” ula ong.
Kiwei pat kiba la ai jingkren ki kynthup ia ka Myntri ka Koit ka Khiah Kong Ampareen Lyngdoh, u Dr Roderico H Ofrin uba dei u WR, WHO, India.
Ha kane ka sngi u Myntri Rangbah ka Jylla ula pyllait paidbah ruh ïa ka kor Meghalaya Mobile Portable AI based X-Ray diagnostic.