Shillong, Risaw 01: U Lat ka Jylla Meghalaya, u C.H. Vijayashankar, ha ka sngi saitjaiñ u la leit jngoh ïa ka Eastern West Khasi Hills District, ha kaba u la leit jngoh kyrpang ïa ka Tirot Sing Memorial Civil Hospital Mairang, kum shibynta ban buddien halor ka jingpyntreikam ïa ka Swasth Nari Sashakt Parivar Abhiyan, ka shkim kyrpang kaba la plie paidbah da u Myntri Rangbah duh ka Ri, u Narendra Modi ha ka 17 tarik mynta u bnai.
Ka Swasth Nari Sashakt Parivar Abhiyan, ka dei skhim kaba peit kyrpang ïa ka koit ka khiah jong ki kynthei. Kane ka campaign ka la sdang naduh ka 17 tarik Nailur bad kan kut ha ka 2 tarik Risaw ha kaba la pyntreikam ïa ka ha baroh ka ri India.
Ha kane ka sngi u lat u la ïakynduh bad ïakren bad ki nongpang, ki nongshim dawai, ki doctor, ki nurse bad ki nongtrei ha kane ka jaka ai jingsumar.
La synran ïa u Lat da u Commissioner & Secretary ka Health Welfare and Family Department Dr. Joram Beda, ka Deputy Commissioner jong ka District ka kong Anita Kharpor, ka District Medical and health Officer ka Dr M.Sohliya, u Medical Superintendent ka Tirot Sing Memorial Civil Hospital Mairang u Dr.Timothy Lyngdoh, u Superintendent of Police u bah D.Khyriem, ryngkat ki doktor ki nurse ki khynnah skul bad ki nongwan shim dawai kiba la wan na kylleng ki jaka jong ka district.
Ha kane ka sngi, u Lat u la sam ruh ïa ki song jingbam ba tei met sha ki longkmie ba ar met bad sha ki ba pang TB, katba ïa ki samla kynthei lud lah ïoh ban sam mar shisong ki jaiñ sumar met, kum ka dak ba ka ri India ka ieid, ka ñiewkor bad ka sumar kyrpang ïa ki longkmie bad ki khun kynthei.
Haba kren kum u Kongsan, u la ong ba ka dawbah jong u ban wan sha kane ka jingïalang, ka dei ka bynta jong ka prokram ba la plie da u Myntri Rangbah duh ka Ri India u Narendra Modi ha ka 17 tarik mynta u bnai, ïa kaba la tip kum ka Swasth Nari Sashakt Parivar Abhiyan. Kane ka skhim kan ïarap ïa ki kynthei, khynnah, ban ïoh ei ïa ka jing check-up, ka jingtest da ki kor ïa ka jingshitom, khlem da donkam ban siew pisa bad ka jingïoh jingsumar ei na ki doctor.
U la pynpaw ba wat la u dang shu dep shah sumar (surgery) dang shen, hynrei u la jied hi ban wan namar u ieit bad jied ïa ka jingkoit jingkhiah bad ka jingbha jingmiat jong ki paidbah ka Meghalaya. U la ong ba ka jingdonkam ba hakhmat eh jong u kum u Lat ka dei shwa na bynta ki paidbah.
U la pynshai halor ka jingmut jong ka kyntien Swasth Nari Sashakt Parivar Abhiyan, kaba thew ïa ka kynthei kaba koit ba khiah bad ka ïing ka sem kaba khlaiñ. U kyntu ïa ki longkmie, ki khun kynthei ba kin shim ïa kane ka lad jingsumar ban phah sumar ïalade na ka bynta ka jingkoit jingkhiah bad jingmyntoi jong ki hi.
U la kyntu ïa ki tnad sorkar baroh ban ai ka jingïatreilang, ha ka ban pynshai paidbah halor kane ka skhim khnang ba yn ym don ki khun kynthei ne ki longkmie, ki ban duh ïa kane ka lad ba la ai kyrpang na ka bynta jong ki.
U Lat ka Jylla u la pynpaw ka jingïaroh ïa ki bor pynïaid district khamtam ka health department, halor ka jinglah jong ki ban ai ïa ka jingshakri kaba bha ïa ki paidbah. Ka Tirot Sing Memorial Civil Hospital Mairang, kan long kum ka nuksa sha kiwei pat.
U la ong ruh shen ka sorkar kan sa khmih halor ka jingpyntreikam ïa ka Swasth Nari Sashakt Parivar Abhiyan hapoh ka Jylla bad yn jied ïa ki lai tylli ki district kiba lah ban pyntreikam bha ha ka kyrdan kaba nyngkong, kaba ar bad ka ba lai. U pynshlur ïa ki nongtrei jong ka koit ka khiah ban trei shitom shuh shuh, khnang ban lah ban pynurlong ïa ka jingthmu jong ka sorkar ban pynmyntoi ïa u paidbah. U la ong ruh ka Jylla Meghalaya ka mad ïa ki jingpang kiba ktah shisha ïa ki nongshong shnong bad ki longïing longsem kum ka jingpang cancer, TB, AIDS bad u drug.
U la ong ba ka dei ïa baroh ban wad ïa ki daw tynrai halor kine ki jingpang, ban thaw ki lad ki lynti ban pynshai paidbah halor ka jingshyrkhei kine ki jingpang, khnang ba ki nongshong shnong kin sngewthuh bad ba kin kiar na kiei kiei ki jinglong kiba sniew bad ruh ki lad ki lynti ki ban pynkoit pat.
Shuh shuh, ha kane ka Sngi u Lat u la ïoh ruh ban ïamir jingmut bad ki Ophisar na ki department bapher bapher jong ka District ha ka jingïalang kaba la pynlong hapoh circuit house Mairang.
