Ka jingkiew ki marbam ka lah ban dei na ka jingrem ha ka kit ka bah, ong ka tnat FCSCA
Shillong, Nailur 13: Haba pynpaw ïa ka jingdonkam jong ka por na ka liang jong ka tnat Food Civil Supplies and Consumers Affairs (FCSCA) ka la shim bun ki sienjam ban pynneh ïa ka dor jong ki mar bam kaba long ka jingdonkam na ka bynta baroh ki nongshong shnong. Ïa kane ka kam kaba kongsan la pyntreikam hapoh ka Price Monitoring System (PMS). “Kane ka rukom treikam kaba don ha manla ki district, ki lum bad ki sam ïa ka dor jong ki mar bam kiba ju die khutia kiba kynthup ïa ki 22 tylli ki mar bam khnang ban ïada ïa ka bha ka miat jong ki nongthied ha ka dor kaba biang,” ong ka kyrwoh ba la phah da ka tnat ha ka sngi Thohdieng.
Ka la ong ba na ka bynta ban pynbha ïa ki dor ki mur manla ka sngi, ka sorkar pdeng ka la buh ïa ki dor ki mur jong ki 22 haduh ki 38 tylli ki marbam, kaba la treikam naduh ka 1 tarik u Nailar, 2024. Kane ka jingpynïar ka kynthup ïa ki 16 tylli ki marbam kiba don hapoh ka thup Consumer Food Price Index (CFPI) jong ka Consumer Price Index (CPI) jong ka Ministry of Statistics & Programme Implementation. “Ïa ka Shillong, Tura, Jowai, Sohra, Mairang, Nongpoh, Khliehriat, Nongstoiñ, Mawkyrwat, bad Williamnagar ki la don hapoh ka Price Monitoring System (PMS) ban pynthikna ba ki dor kim dei ban tam ïa ka All-India Rate of Essential Commodities,” ong ka tnat.
Ïa ka State Level Price Monitoring Committee bad District/Sub-Divisional Vigilance bad Monitoring Committee la ai bor ba kin peit ïa ka jingkiew jinghiar jong ki marbam khnang ba kan ym don kano kano ka jingleh bakla.
Na ka liang ka tnat ka pynneh ruh ïa ka Price Monitoring System (PMS) Dashboard, kaba pyni ïa ki dor ki mur jong ki marbam manla ka sngi ha kylleng jong ki district bad ki sub division. Kane ka MIS Dashboard ka la long ka atiar kaba kongsan bha kaba la shim rai ruh da ka tnat. Ïa ki Retail Prices MIS jong ka Meghalaya lah ban peit lyngba ka website jong ka tnat ha ka https://megfcsca.gov.in.
Ka jingkiew ki mar bam ka lah ruh ban long na ka jingshim dor rem ki nongbylla bad ka jingkit jingbah ïa ki mar bam.
Ka jinglong lum (Hill) jong ka jylla Meghalaya ka la nang kyntiew ïa ka jingkiew dor ha ka kit ka bah, ha kaba kane ka la ktah ïa ki nongthied. Ka jingshaniah jong ka jylla haba ïadei bad ka jingthied ïa ki mar na shabar ka jylla ka la nang ktah shuh shuh ïa ka jinglong jingman jong ka jingkiew ki marbam ha kane ka jylla.