Ka jingkiew ka GDP ka India: Ka don ha ka lynti ban poi kyrdan ba 3 ha ka pyrthei

0

Shillong, Nailar 30: Ka jingkiew jong ka ïoh ka kot jong ka India ka dang ïai bteng ban ai mynsiem, ha kaba ka GDP ka kiew haduh 7.8% ha u bnai Ïaïong- Jylliew jong u snem mang tyngka 2025-26, kaba kiew na ka 6.5% ha u snem ba la dep. Ka jingkiew kaba khlaiñ ka pynskhem ïa ka kyrdan jong ka India kum ka ïoh ka kot kaba kiew stet tam ha ka pyrthei, kaba la pynlong da ka jingdawa kaba khlaiñ hapoh ka ri, ki jingshakri kiba thymmai, bad ki jingpynkylla kiba wanrah jingkylla.
Mynta ka India ka long ka ri kaba saw kaba ïar tam ha ka ïoh ka kot, la antad ba kan long ka ri kaba lai ha ka pyrthei shuwa u snem 2030, ha kaba ka GDP kan long $7.3 trillion. Ka jingkiew kaba jur ha ka Q1 la lamkhmat da ka kam ai jingshakri, kaba la kiew da 9.3%. Ka kam shna tiar (7.7%) bad ka kam tei jingtei (7.6%) ruh ka la don ka jingkiew kaba khlaiñ, katba ka kam rep bad ki kam ba ïadei bad kane ki la kiew sha ka 3.7%.
Ka Gross Value Added (GVA), ka sienjam ba kongsan jong ka kam ba ïadei bad ka ïoh ka kot, ka la kiew da 7.6% hapoh ka lai bnai. “Kane ka pyni ïa ka jingkiew ha baroh ki liang ha ka rep ka riang, ka kam shna tiar, kam tei jingtei, bad ki kam ai jingshakri, kaba la pynshong nongrim ha ki nongrim kiba khlaiñ,” la ong ka Anuradha Thakur, Economic Affairs Secretary.
Ka jingkiew dor ka la hiar bha, ha kaba ka CPI ka la hiar sha ka 1.55% ha u bnai Naitung 2025 – kaba duna tam naduh u snem 2017. Ka jingkiew dor jong ki marbam ka la hiar bha, kaba la ïarap ïa ki longïing bad kyntiew ïa ka jingpyndonkam. Ka jingpynbeit ryntih ka pynkhlaiñ ruh ïa ka jingryntih jong ka ïoh ka kot bad kane ka plie lad ïa ki polisi kiba ïadei bad ka roi ka par.
Ka jingïoh kam jong ka India ka la ïohi ïa ka jingkylla kaba khraw, ha kaba la pynmih 17 klur tylli ki kam ha kine ki shiphew snem ba la dep. Ka jingïashim bynta jong ki kynthei ha ka kam ka la kiew haduh ar shah na ka 23.3% ha u snem 2017-18 sha ka 41.7% ha u snem 2023-24, kaba pyni ïa ka jingïadon bynta lang kaba kham heh. Ka jingbym don kam don jam ka la hiar sha ka 3.2% ha u snem 2023-24, bad ka long 5.2% ha u Naitung 2025, kaba long hapoh ka jingkheiñ kyllum ha ka pyrthei.
Ka jingbei tyngka ka dang khlaiñ. Ka India ka la khring ïa ka rekod kaba $81 billion ha ka FDI ha u snem mang tyngka 2024-25, katba ka pisa ba la buh kyrpang ka la poi sha ka $700 billion. Ka jingpynlut pisa ruh ka la tam ïa ka T.10.5 trillion ha u snem ba la dep, kaba la kyntiew ïa ka jingkiew ki jingdon jingem. Ki jingpynkylla kiba dang wan kum ka GST bad ki skhim kum ka PM Viksit Bharat Rozgar Yojana ki thmu ban pynneh ïa kane ka bor.
Ki jaka treikam kylleng ka pyrthei ki la ithuh ïa ka jingtreikam jong ka India. Ka IMF ka antad ba kan kiew da 6.4% ha u snem 2025 bad 2026, katba ka S&P Global dang shen ka la kyntiew ïa ka credit rating jong ka India sha ka ‘BBB’, kaba dei ka jingkiew kaba nyngkong ha ki 18 snem.
Kumba u Myntri Rangbahduh ka ri u Narendra Modi u la ong, “Mynta ka ri ka ïaid stet bha ban long ka ri kaba lai kaba ïar tam ha ka ïoh ka kot.” Lyngba ki nongrim kiba khlaiñ, ki jingpynkylla ha ka rukom treikam, bad ka jingdawa kaba skhem, ka khana jong ka jingkiew ka India ka la pynkhreh ban sah kum ka nuksa ha ka pyrthei.

Leave A Reply

Your email address will not be published.