Ka jingkiew bad jinghiar ka ju jia beit ha saiñ pyrthei jongka jingsynshar paidbah : MLA Nongpoh

Shillong, Iaiong 6 : U MLA ka UDP Bah Mayralborn Syiem ha ka sngi Nyngkong, ula ong ba man la ki seng saiñ pyrthei ki ju mad beit ïa ka por ka jingkiew bad ka por ka jinghiar bad ka nusib ka ju kylla beit ha ka sain pyrthei jongka jingsynshar paidbah bad dei ki nongthep vote kiba rai haba kut.
U Bah Mayral ula kynthoh ïa kane halor ki khana ba paw bha ka Voice of the People Party (VPP) ha ka elekshon Shillong Lok Sabha 2024 bad kaei ka ban jia ïa ka elekshon shiteng samoi.
“Ka don ka por ïa kiei kiei baroh. Ka don beit ka jingkiew bad ka jinghiar jong kano kano ka seng saiñ pyrthei” kynthoh u Bah Mayral.
“Lada phi ïakren ïa ka saiñ pyrthei hapoh ka ri, ka don ka por kaba ka Congress ka khlaiñ bha bad mynta ka la troiñ. Ka BJP ka khlaiñ bha ïa mynta. Kan sa poi ka por ba ki paidbah kin sa ai ïa ka jubab kaba ïahap bad kano kano ka Sorkar. Kane ka dei kaba ju jia beit”.
Ula ban jur ba ym don satia kano kano ka seng saiñ pyrthei ka ban don beit ha ka bor shi junom.
“Kam don satia kano kano ka seng saiñ pyrthei ka ban neh haduh 40-50 snem. Kane ka dei ka jingitynnad jong ka synshar paidbah. Na kata ka daw ngi dei shibynta jong kane ka synshar paidbah ba don da ka riti synshar, ki election bad ka jingkylla ha ka jingpaw”.
U Bah Mayral ula ong ba ym tang ka VPP hynrei man ki seng saiñ pyrthei kila mad ïa ka jingkyrshan u paidbah ha ki por bapher bapher.
“Ka BJP ka la pawnam bha, ka NPP kala pawnam, ka UDP ruh. Baroh ki seng saiñ pyrthei kila paw nam. Phim lah ban tip kaei pat ka ban jia. Ki nongthep vote ka Meghalaya ki dei kiba stad bad ki tip ïano ban jied kum ki nongmihkhmat jong ki. Ngi ieh ha ka jingstad u paidbah” ula ong.