Nongstoiñ, Risaw 20: Ka wah Ryndi ka dei ka wah kaba long kum u laiñ ba phiah ïa ka West Khasi Hills bad ka East Garo hills bad ha shiliang jong katei ka wah, ka don ka ïew Mangsang kaba dei kawei na ki ïew kiba donkam tam ha katei ka thaiñ.
Ki nongshong shnong na West Khasi Hills kata naduh Nongjri, Lawdap, Japung, Mawdonglang, Borkhe, Missei, Mawkohram bad bun kiwei pat ki shnong kiba don ha katei ka thaiñ ki ju leit siew leit tda man ka taïew na ïew Mangsang.
Lajan baroh ki nongkhaïi bad ki ba shong die jingdie man la ka sngi ha ki dukan kiba heh ki dei ki briew na Assam. Hynrei tang ha ka sngi ïew ki don bun bah ki dukan jong ki Khasi ruh.
Ha ki snem ba ladep haba ym pat don ka surok bad ka jingkieng ban kam sha shiliang ka wah Ryndi, ha ka por lyiur haba jur slap ki paitbah ba leit ïew leit hat ki shem shitom bha bad ïa ka jingkieng la shu shna da ki siej.
U bah Phrengland Thongni Sordar barim ka shnong Japung haba ïakren bad u nongthoh khubor, u la ong ba mynta u snem na ka shnong Jynruñiangbrak kaba don harud ka wah, ladep shna da ka jingkieng dewbilat na shilliang sha shilliang bad ïa ka surok la dep siang rong naduh katei ka shnong haduh ka surok bah kaba la shna na Nongchram sha duh Dhupdhara Assam.
U la ong ruh ba ha kine ki snem naduh ba la siang rong ïa ka surok naduh Missei haduh ka surok bah Riangdo-Athiabari, ki paitbah katei ka thaiñ naduh Missei ki la suk ha ka leit ka wan ka kit ka bah khamtam haba don kiba pang ba shitom kiba don kam ban pynkit kyrkieh sha Riangdo CHC.
U la pynkynmaw ruh ba ka jingïoh ïa ka surok rong naduh Missei haduh Riangkang, ka dei lyngba ka jingtrei shitom jong ki nongsynshar shnong ka thaiñ bad ruh ka jingtrei shitom jong u bah Witting Mawsor mynba u dang long u MLA ka Mawshynrut.
