Ka jingkhynra naphang ka Assam ïa ki mynder ka buh jingma ïa ka jylla: Dominik Wahlang

Nongstoiñ, Nailar 14: Haduh kine ki sngi ka sorkar Assam kam shym pat la sngeh ban khynra naphang ïa ki mynder kiba khem don ïa ki jingthoh jingtar ban pynshisha ba ki dei ki nong India ïa kiba la suba jur ba ki dei kiba wan rung tuh na Bangladesh bad kiba shong ha ki jaka sorkar ba kynthup ruh ïa ki khlaw sorkar.
U bah Dominik Wahlang uba la ïakhun ïa ka Election MDC 2024 kum u kyrtong ka BJP na ka Rambrai Jyrngam constituency haba ïakren bad u nongthohkhubor jong u Mawphor u la ong ba katkum ka jingïoh jingtip jong u na ki paralok kiba don ha Assam ki la ong ba haduh kine ki sngi ki mynder kiba shah khynra bad shah beh thong ha ka sorkar Assam ki la kot sha ki lak ngut. Kumta u la ong ba shaei kitei ki mynder kiba shah khynra na Assam ki leit bad kaba sngew syier mynta ka long ba ïoh lehse kitei ki lak ngut ki mynder ki la ïoh ban wan rung sha Meghalaya namar ki don ki surok kiba kiew na Assam sha Meghalaya ki bym don satia ki Infiltration Check Gate lane ki khyrdop talasi mynder kum ha ka surok na Patarkhmah – Jirang kaba mih sha Beltola nangta ka surok na Kamphaduli sha Langpih Mawsikar , Kyrdum Nonglang ter ter haduh Nongstoiñ.
Nalor kata u bah wahlang u la ong ruh ba la jan man ka taiew u ju ïohi ha ki ladpathaikhubor ba ki don ki trai jylla kiba long kum ki ksiang ban pynrung ïa kine ki mynder shapoh ka jylla lyngba ki shnong khappud tang ban ïoh kamai pisa bad katei ka jingleh ka dei kaba sniew haduh katta katta bad kaba pynjot ruh ïa ka imlang sahlang bad ka jaitbynriew hi baroh kawei.
Utei u rangbah u la ong ruh ba kumba ka long ha kine ki sngi ki mynder khamtam ki mynder na Bangladesh ki ïoh ban rung sha ka jylla wat lyngba ki surok bah kiba ki pulit jong ka tnad Infiltration ki pahara miet la bad sngi te kan eh aïu ïa ki ban rung laitluid na ki surok ki bym don ki khyrdop talasi mynder. Nalor kata u la ong ruh ba imat ka sorkar Meghalaya haduh mynta kam pat shim khia ban phah khynra naphang ïa ki mynder kiba don ha kane ka jylla.
Shuh shuh u la ong ruh ba ha kine ki sngi ka sorkar jylla ka la dei ban shim khia bad ban bthah ïa baroh ki bor pynïaid district ba kin khynra naphang ïa ki bar jylla khamtam eh ha ki jaka ba don ki karkhana thang dewïong kum ha Shahlang bad baroh ki dukan ba heh bad barit ki la dei kiba shong da ki briew kiba nabar.
Khatduh eh u la ong ba lada ka sorkar Meghalaya kam leh tyngeh ha kane ka por kan ym lah shuh ban beh ïa ki briew kiba nabar ynda ki la shong kham slem namar ki lah ban kam ba ki dei ki trai shnong da kino kino ki lad ba ki lah ban pynshisha la ka long da kaba thied da ka dor kaba rem ia ki kot ki sla ban pynshisha.