Ka jingkhot sha ka jinglong Lyngdoh ka long ka jingkhot ban shakri ïa U Blei bad ïala ki para briew: Bishop Ferdinand Dkhar
(By M.M. Thaiang)
Jowai : Rymphang10: Ha ki phew snem kiba la leitnoh la don ki khun samla Shynrang na ka shnong Byndihati kiba la pyrshang ban jubab ïa ka jingkhot u Blei sha ka jinglong Lyngdohniam pynban U Blei Um pat ibit I biang bad ïa kane ka jingkhot ban long Lyngdoh-niam (Lyngdohsohblei) la don u Deacon Resto Shylla u long uba la kloi ïa kane ka jingkhot bad la pynkyntang Lyngdohsohblei ïa u hynnin ka sngi (09/02/2025) ha shnong Byndihati kaba hap hapoh ka Parish Khliehriat da u Lyngdohsad ka Jylla niam Jowai (Jowai Diocese) Most. Rev. Ferdinand Dkhar. D.D.
Ha kane ka jingpyn-kyntang Lyngdohsohblei ( Lyngdohniam) ïa u Deacon Resto Shylla da ki phew hajar ngut ki paidriewngeit napoh ka Bri U Hynniewtrep bad nabar ki la ïawan sha Byndihati ban ïa sakhi ïa kane ka jingkhot U Blei ia u Deacon Resto Shylla ha ka ban shakri ïa U Blei bad ïala ki parabriew.
Ha ka por 10 baje mynstep ka Mas Jingknia Iukharist bad ka jingpyn-kyntang Lyngdohsohblei ïa u Deacon Resto Shylla da u Most Rev. Ferdinand Dkhar ha ryngkat ka jingïasynranlang ki 56 ngut ki Lyngdohsohblei kiba napoh ka Jowai Diocese, Nongstoin, Archdiocese Shillong bad katto katne ngut ki Lyngdohsohblei na ka Jylla Kerela( South India) kiba la ïawan ban sakhilang ïa kane ka jingpynkyntang Lyngdohniam ïa u Deacon Resto Shylla uba dei na ka kynhun jingïasyllok jong u Francis Assisi, ïa kiba la kham ïatip mynta kum ki OFM.Cap. Ka jinglehniam ha kane ka sngi ka long kaba iphuh iphieng, kaba shongkun shongblei, naba katba u Lyngdohsad, ki Lyngdohsohblei bad u Deacon Resto Shylla ki dangkiew sha Duwan jingknia ban pyndep ïa ka jinglehniam la pdiang sngewbha ïa ki da ki jingrwai bad ka jingshad tynrai da ki khun Samla Khyllood jong ka Balang shnong Byndihati.
U Bishop Ferdinand u kongsan ha baroh ki jinglehniam, ha ka sneng ka kraw ïa ki paidriewngeit, u ong ba hapoh ka Balang, u Blei u don la ka jong ka saindur ban long ki longkmie longkpa, ki Nongïathuhlypa, ki Nongsynshar, ki Nonghikai, ki Doktor, ki Syiem,kiwei de ki jingkhot bad ban long ki Lyngdohniam bad ha kine ki jingkhot bapher bapher ngin pyndep hok da ka jingriewblei na ka bynta ka burom ka jong u Blei bad ka jingkiew irat jong ki paid bynriew ha ka bha ka miat jong ka longbriew manbriew.
Ha ka sneng ka kraw ïa u Lyngdohsohblei thymmai ( Resto Shylla), u Bishop Ferdinand u ong ka jingkhot ïa phi sha ka jinglong Lyngdohniam ka long ka jingkhot ban shakri ia u Blei bad ïa ki paid ki jong u Blei ym ban shah shakri bad u da shim artat na ki kyntien jong ka jingthoh bakhuid ( Mat.20:28) kaba ong “ U khun u briew Um shym la wan ba yn dup shakri ia u, hynrei u la wan ban shakri”. Haba kren shuh shuh shaphang ki Lyngdoh. U Bishop Ferdinand u ong “ïa ki Lyngdohniam Katholik la jied napdeng ki briew, la thung ban long ki Nongmihkhmat ki briew hakhmat u Blei ban tyrwa ïa ki jynai bad ka jingkñia na ka bynta ki lait ki let lajong, jong u paidbah bad jong u khun bynriew.
Nangta u Bishop Ferdinand u ong, ki Lyngdoh ki dei ki Nongiatreilang kiba bitdor jong u Lyngdohsad haba sumar bad bsa ïa ka kynhun langbrot jong u Blei, ki long ki Nonghikai, ki Nongpynphriang Ia ka ktien ka jong u Blei da kaba ialap ia ka Khubor babha kat kum ka jinghikai bad ka jingleh jingkam jong u Jisu Khrist, ka jingknia Iukharist, ka Sakrament jingpynïasuk kat kum ka jinghikai pateng jong ka Balang bad ban duwai ban ïoh ka jingisynei u Blei na ka ka bynta uba bun uba lang ïa kaba u Blei u la pynkhamti ha ki pynkut ka jingkren sneng kren kraw jong u Bishop Ferdinand.
Ha ka nohphai sngi jong kane ka sngi la don ka jingïaid proseshon kaba lyngkot hapoh ka shnong Myndihati, la pynkut da ka jingkyrkhu bakyrpang da u Lyngdohsad bad u Lyngdohsohblei bathymmai bad ka jinglehburom ïa u Lyngdohsohblei thymmai.