Shillong, Risaw 13: Ka Special Investigation Team (SIT) kaba dei ka kynhun tohkit ka la pynpaw ba ka jingkhlad noh i heprit ba la 4 snem ka rta i Insaphira Lyngdoh Mawnai ka dei na ka jingmih ka jingngam jyllop homicidal.
“Ka SIT ka la pynpaw ba kane ka jingjia aksiden ngam jyllop homicidal,” ïathuh u Superintendent of Police ka East Khasi Hills u Bah Vivek Syiem haba kren sha ki lad pathai khubor ha ka sngi Nyngkong.
Ha ka 14 tarik u Nailur, une u khynnah ba la 13 snem ka rta, uba dei ruh uba sah marjan ïing bad uba ju leit kai manla ka por ha ka ïing jong i lanot, u la shah bat bad mynta u dangsah hapoh ka ïing sah ki khynnah rit (juvenile home), hadien ba ula kubur ba u la ïalam ïa katei ka heprit sha kawei ka ïing ba dang shna, kaba la lap ruh ïa ka met jong ka ha ka 15 tarik u Nailur.
I heprit Insaphira Lyngdoh Mawnai ba la khladnoh, la pyntip ba ila jah na la ïing kaba ha ka shnong Nongrah Nonglum ha ka por 8 baje mynstep jong ka 14 tarik u Nailur.
Haba ong ba ka daw sha lyndet kane ka jingleh ka dang don mynta hapdeng ka jingtohkit, u Bah Syiem u la ong ba namar ka long ka bym shai la kane ka jingleh kadei na ka daw ka jingïaknieh biscuit lane ka jingpyrshang ban leh khlem akor.
Ki la don shibun ki jingpyni halor ka jingpyrshang ban ktah kti ne leh khlem akor (sexual assault attempt). Ka SIT kan dang shim ïa ka por ban pynpaw la ka don ne em ka jingpyrshang leh khlem akor hynrei kawei kaba thikna ka dei ka jingngam jyllop homicidal,” u la bynrap.
U SP u la pynpaw ruh ïa ka jingbym lah ban long ban donkti lang jong kiwei pat ki riew shimet halor kane ka kam runar, da kaba pynskhem ba u khynnah ba 13 snem ka rta u dei uba donkti hi tang marwei.
Ka jingtohkit ka dang ïaid, bad ki pulit kin sa pynkhreh ïa ka por ban ujor chargesheet shisien ba la pyndep ïa ka jingtohkit, u la bynrap.
