Ka jingkam ka Assam ba ka Meghalaya ka la knieh jaka ka long ka bym lah pdiang: Jonendro Borchugre

Nongstoiñ, Ïaiong 09: Ki paidbah nongshong shnong khappud jong ka West Khasi Hills, hadien ba ka la mih ka jingkynnoh na ka Assam ba ka Meghalaya ka la knieh jubor da ki phew hajar hektar ki jaka jong kiba dei jong ka jylla Assam, ki la pynpaw ïa ka jingbitar kaba jur bad ong ba ïa kane hi yn ym lah ban pdiang da lei lei.
Ki riew rangbah bad ki paidbah jong ki shnong khappud kum na Malangkona, Kyrshai, Nongspung bad Langpih, ki la ong ba katei ka jingkam jong ka Assam ka la pynkyndit ïa ki namar kitei ki jaka ba ka Assam ka kam, ki dei hok ki jaka jong ki Khasi.
U bah Jonendro Borchugre na Malangkona u la ong ba mynshuwa eh ka ïew Gamrimura kaba don ha Malangkona, ka dei ka jaka kaba hap ha ka hima Nonglang Sirdarship bad ka dei ruh ka ïew kaba la rim tam ha ka thaiñ. Hynrei naduh ki snem 1990 ka Assam ka la sdang ban wan kyntur pud bad mynta lei lei ka la kam trai syndon bad ka la ïakhun doh ïap ban kyntur haduh Huhuapara, hynrei ki paidbah kim ailad satia.
U la ong ruh ba katkum ka jingtip jong u, ka ïew Hahim kaba don shaphang mihngi na Malangkona ka dei ka ïew kaba ki Assamese ruh kim long trai, ki Khasi ruh kim longtrai, namar ka don ha u laiñ bad ka long kum u pud u sam jong ki Khasi bad ki Assamese.
Nalorkata u la ong ba kham shakhmat ïa ka madan ïalehkai harud kawei ka pynthor kba, u don u mawbynna u ba la sieh da ki tymmen Khasi naduh hyndai hynthai kum u maw pud, Hynrei ka Assam mynta ka la leit kam haduh shiliang jong ka wah Tyrsung bad shna ktem pulit ha ka jaka kaba dei jong ka hima Jyrngam Sirdarship ha synad bad ka shnong Umsaitwait.
Halor katei ka jingkynnoh jong ka Assam ki rangbah na ka thaiñ Langpih pat ki la ong, ba ka jingkam jong ka sorkar Assam ba ka Meghalaya ka la knieh ïa ki jaka jong ka, ka long ka bym lah satia ban pdiang da lei lei ruh, namar lada pynshisha katkum ki dak ki shin, ki kot ki sla bad ka map kaba la ithuh da ka Survey of India ha u snem 19-11-12, u pud u sam jong ka United Khasi & Jaiñtia Hills, u sdang na Bangjeng shaphang shatei lam mihngi ter ter shaduh kliar jong u lum Langthuri bad hiar biang shaphang shathie lam mihngi. Nangta kiew biang shaphang shatei ban poi ha ka shnong Daluthua shaduh Meghamdol, kaba don shaphang shatei hiar pat shaphang shathie haduh Umthali, Noonmati, Borjhar haduh Ukiam.
Ki la ong ba lada ka Assam ka kynnoh ba ka Meglalaya ka la knieh ïa ki jaka jong ka, ka dei tang ka jingkam khlem nongrim. Lada phai sha ki por kiba mynhyndai lei lei, u pud jong ka jingsynshar ki Syiem Khasi u dei naduh ka surok bah National Highway na Guwahati sha Goalpara bad na Guwahai sha mihngi, u pud u dei na ka surok National Highway kaba leit sha Nawgong haduh Karimganj. Kumno pat ka Assam kam lehraiñ ban kynnoh.
La ong ba lada bishar bniah ïa ka jinglong jingman jong ki nongshong shnong ruh, naduh Kamphaduli haduh ban da poi ha Mawsikar ym don da kiwei ki jait bynriew kum ki Rabha, Boro ne Assamese lait noh tang ki Garo, Khasi bad ki Nepali kiba shu wan shong thap namar kim don jaka hangno hangno ruh ba kin pynlong shnong namar ba kim dei ki nong India.
Ka jingwan shong thap jong ki Nepali, ka dei ruh kaba la pynshlur da ka sorkar Assam bad ban pynlong ïa ki kum ki dieng ker kper. Ki la ong ba ka sorkar Megalaya kam dei ban kheiñ sting halor katei ka jingkynnoh ka Assam, hynrei ka dei ban shimkhia ban ïa pynbeit katkum ki jingthoh jingtar bad ki map ba la buh naduh mynshuwa.