Nongstoiñ, Nailur 01: Ki shnong ki thaw kiba don ha ka thaiñ Langpih ba kynthup ïa ki shnong Khasi bad Garo, ki dei ki shnong ki bym ju shah ïa ki nongshong shnong ba kin shet bad die kyiad. Hynrei dei tang ha ki jaka ba ki Nepali ki pynlong shnong kum ha Lawbah ba ki khot ka Harshanagar, Makoibari bad Langpih ba ka kyiad ka jyllei bha.
Ka jingjyllei jong ki Nepali kiba shet kyiad, bun sien ka pynlong ïa ki Khasi kiba dei ki nongdih ba kin kyrni bad ba haba ki la shohkhawiang, ka pynlong ïa ki ba kin pynklumar ïa kiwei pat.
Kum ban pynkynmaw ba dang ha ka sngi thohdieng ba la dep, ka la don ka jingshah shoh shah bom jong ki ar ngut ki Khasi ha u Officer Incharge jong ki pulit Assam, ïa u ba la wan ban pynkit sha Civil Hospital Nongstoiñ na ka daw jong ka jingmynsaw ba un shah sumar.
U nongthoh khubor haba pyrshang ban tih bniah ïa ka daw halor katei ka jingjia lyngba ki riew rangbah ka thaiñ Langpih, uwei na ki nong shnong u bym kwah ban pynpaw kyrteng, u la ong ba ha katei ka sngi uwei na kitei kiba shah shoh u la leit ban phah recharge ïa ka mobile jong u ha uwei u Dkhar u ba shong dukan ha ïew jong ki Nepali ha Langpih, ha kaba utei u nongshong dukan u ba recharge mobile u la kylli ïa u number jong utei u briew. Hynrei namar ba u la shoh khawiang u la kum bakla ban ong ïa u mobile number bad ka recharge ka la poi noh sha u number jong no ruh ym tip.
La ong ruh ba ynda u la pyrshang ban telephone ka mobile jong u kam treikam namar ba u la bakla ban ong ïa u number bad ka balance ba la dep recharge ka la rung noh shawei pat. Dei hangta ba ka la mih ka jingiania bad ha ka por ba ki la sdang ban ïa khluit, ki la don sa kumba saw ne san ngut ki para lok jong u kiba la wan ban tuklar bad da ka jingwan jong kitei ki para lok utei u briew u la sdang ban syndong kti ïa utei u dkhar u ba recharge mobile.
La ong ruh ba utei u dkhar namar ba u la sheptieng u la phone sha ki pulit Assam, ha kaba u Officer Incharge u la wan poi bad u la thap bad shoh ïa utei u Khasi bad mar ïapoi utei u pulit Assam, ki paralok kiba don bad utei u ba shah shoh ki la ïaphet krad lai lum lai wah bad ieh noh satang ïa kitei ki ar ngut.
Utei u pulit u la rah ïa ki sha ka ktem pulit Assam ha Langpih bad ynda la poi ha poh ktem ruh utei u pulit Assam u dang shoh bad bom ïa utei u briew haduh ba u la mynsaw. Kiwei pat ki tyllong khubor ba la ïoh na katei ka thaiñ ki la ong ba kitei kiba shah shoh haba ki la dih kyiad ki ju mlien bha ban pynklumar.
Watla katta ruh na ka liang ki riew rangbah ka thaiñ ba kynthup ïa u bah Trasdingland Nonglang president ka Synjuk Rangbah shnong jong ka thaiñ Langpih, bah S.P.Nongphud Chairman jong ka Komiti ïew Langpih bad kiwei kiwei, ki pynrem jur ïa ka jingshoh dusmon jong utei u heh pulit ka Assam ïa kitei ki a rngut, da kaba ong ba ha ka jingshisha kum u ophisar u ba bat ïa ka aiñ u dei ban sngewthuh ba ha kane ka juk shai mynta, ka aiñ ka la pyrkhing bha ban ktah kti ïa ki briew la ki dei ki nongtuh, ki riew runar ne kino kino kiba leh kam sniew, hynrei ka jingpynshitom ka dei da kaba pyntrei kam da ka aiñ la ka dei da kaba daiñ kuna ne da kaba set phatok.
Ki la ong ruh ba lada utei u heh pulit jong ka Assam u lap ba ka don ka jingïa kajia hapdeng jong utei u Dkhar bad kitei ki Khasi, u la dei ban tan lang ïa ki baroh sha ktem pulit bad bishar ban lap ïa ka jingshisha mano ba bakla. Lada kitei ki Khasi ki la buaid u la dei ban shu set ha poh kamra haduh ba kin da pyngngad bad lada um sngew hun ruh, u don ka hok bad shu kawut shi lathi ar lathi tang kum ban ai jingsneng ba kin ym mlien shuh. Hynrei ban shoh ban bom haduh ban da mynsaw te ka long kaei kaei ka bym lah ban pdiang.
Kitei ki rangbah ki la kyntu ïa ki pulit Assam ba nangne shakhmat ba kim dei shuh ban jrongkti da kaba shoh bad bom klumar ïa ki Khasi. Hynrei lada ki lap ba ki leh ïa kino kino ki kam kiba pynklumar ïano ïano ki dei ban bud katkum ki kyndon aiñ.
Nalor kata ki la kyntu ruh ïa ki rangbah shnong ba ki dei ban peitngor bad pyrkhing bha ïa ki nongshong shnong, ba kim dei ban mlien ban pynklumar, namar ka buh jingeh ym tang ïa ki hynrei wat ïa ki nongïalam shnong ruh.
