Shillong, Rymphang 21: U Working President ka KHNAM u Bah Thomas Passah ha ka sngi Thohdieng hadien ba u la dep ban thep ïa ka vote u la ong ba ka jingjop jingrem ka shong ha uba najrong bad kumjuh ruh ki paidbah kiba dei ki kynrad ban rai halor kane ka kam elekshon.
U la ong ruh ba kumba la ju ong manla ka por ba ka jingjop jingrem ka shong hi ha ki kynrad kiba dei ki nongthep vote. “Ka jingpynpaw ïa ki mat ki jura la ïa dep bad lada jop mano mano ruh nga kwah ba ngin ïatrei hok na ka bynta ka jingbha jong ka District Council na ka bynta ban pynneh ïa ka hok longtrai mantrai jong ki pateng ban wan, mat jop mano mano ruh hynrei ka kam kadei ban ïaid beit,” ong u Bah Passah.
Haba ong ïa ka jinglong kongsan jong ka jingthep vote, u Bah Passah u la ong ba ka long kaba donkam bha ïa ki paidbah ba ki dei ban shim ïa kane ka kam thep ba kan long kum ka deiti ha ka jingim, kaba kyntang jong u paidbah ban wan shakhmat ban thep vote namar kane kadei ka elekshon sha ka District Council bad kadei ruh ka elekshon kaba kyrpang bha.
“Lada ka hiar ka jingwan kiba thep vote, ki nongwei ki nongar kin sa shu peit kai. Nga sngewsih ban ïohi ba ha kane ka kynti kaba mynta ka sorkar ka khlem pynkhreh ïa ki riew tymmen bad ki duna ha ki dkhot met ba kin ïoh ka lad ban thep vote ha la ki jong ki ïing ki sem, kumba la leh ha ka MLA elekshon da ka Election Commission of India bad ka khlem pdiang ïa kane ka juh ka rukom treikam bad kane ka long ka jingduhnong ïa ki riew tymmen ha kane ka MDC elekshon,” ong u Bah Passah.
