Ka jingjop bad jingjot ki Khynnah ka shong ha ki nonghikai bad ki kmie ki kpa, ong u Bah Eugeneson

Shillong, Jymmang 20: U Bah Eugeneson Lyngdoh, MLA jong ka Mawphlang Constituency u la ong ba ka jinghikai ïa u khynnah ka don ar bynta. Lada biang ka jinghikai, u khynnah u la poi sha ka jingjop,hynrei lada hikai ha ka lynti bym dei u khynnah u la poi sha ka jingjot.
U Bah Eugene u la ong ïa kane haba kren kum u Kongsan ha ka jingrakhe Jubili Rupa ne ka jingdap 25 snem jong ka Lyngïong Presbyterian Secondary School, kaba la long mynta ka sngi.
Haba ai ka jingïaroh ïa ki nongseng ïa kane ka skul kiba la trei shitom bad aiti lut ha ki arphew snem bala leit noh. U la ong ba ka jingdon kano kano ka skul ka pyni ïa ka jingaid ka roi ka par. “Ka skul kadei ka bynta jong ka roi ka par ha kano kano ka Shnong”, la ong u MLA ka Mawphlang.
Haba ai mynsiem bad aibuit ïa ki Nonghikai, une u Nongaleh Phutbol barim jong ka ri India, u la ong ba ki Nonghikai kidei ban nang ban bishar katkum ka jinglah jong ki khynnah skul. Ym dei ban shu pynïaryngkat lut ïa baroh, namar ba ki khynnah ki don la la ka jong ka sap bad ka jinglah. “Lada ngim nang ban bishar kan ïalam ïa u khynnah sha ka jingjop, hynrei lada ngim nang u khynnah u la poi sha kaba jot”, u la ong.
Ha kajuh ka por u Bah Eugene u la wer ruh ïa ka jingïatreilang jong ki kmie ki kpa bad ka skul da kaba ong ba ki kmie ki kpa kim dei ban shu shaniah tang ha ki nonghikai, namar kane jingleit skul bad ka jingpule mynta ka la kylla bad ka la jur bha ka jingïakhun. Ym lah ban shu leit skul bad long beit shi sur khlem da pyrkhat jngai bha. “Kam dei shuh ban shu ïa ïaid kumba ïaid ha ka surok kaba beit”, la ong u Bah Eugene.
U la ong ruh ba ki kmie ki kpa bad ki nonghikai bad kumjuh ruh ka skul kidei ban don ka jingkitkhlieh na ka bynta ka lawei ki khynnah.
U Bah Eugene u la plie ruh ïa u mawsah kynmaw jong kane ka jingrakhe.
U Bah L. Blah, haba ai jingkren ha kane ka jingrakhe, u la ai khublei kyrpang ïa ka Balang Presbyterian Lyngïong kaba la ïohi jngai ban seng ïa kane ka skul ha kane ka thaiñ bad ha kine ki 25 snem ka la long ka jingkyrkhu kaba khraw ïa ki paidbah jong ka Hima Lyngïong bad ki Shnong ba marjan. U Bah Blah u la kyntiew ïa ka lama ha ka por ba sdang kum ka dak ka jingplie ïa ka Jubili.
U T.Bn N.I Moody Lyngdoh, Secretary jong ka Managing Committee haba ïathuh lyngkot ïa ka jingaid lynti ka skul, u la ong ba kane ka skul ka la sdang shuwa ha ka skul Basic kaba don ha katei ka Shnong, hynrei hadien da ka jingïatrei shitom lang khamtam ka Balang Presbyterian Lyngong kaba long ka Sponsoring Body, ka skul ka la nang kiew na ka snem sha ka snem bad bun ki khynnah ki la pass nang kane ka skul ban don pat ha ki kyrdan bapher bapher jong ka imlang sahlang.
La ïoh jingkren ruh na u Bah VS Nongbet, uba long u Jt. Director ka DSEL,uba la pyllait ruh ïa ka Souvenir, nangta u Lyngdoh ka Hima Lyngïong, u Bah HL Ryntathiang, uba la pynhap ruh ïa ka lama kum ka dak ka jingpynkut ïa ka jingrakhe ïa ka Jubili, bad kiwei kiwei.
La ïoh ruh ïa ka jingrwai bad jingshad tynrai, ka drill na ki khynnah skul bad ka jingrwai kyrpang na ki nonghikai. La ot cake ruh ban lehkmen ha kane ka jingrakhe jubili.
ïa ka jingïalang la pynïaid da u Headmaster jong ka skul, u T.Bn EW Mawlong.