Ka jingjied Myntri ïanga ka dei ka jingsarong ïaka district, ka jingkyrmen ba ka NPP kan nang kiew

Nongpoh, Risaw 01: Ka National People’s Party, Ri-Bhoi District Unit, mynta ka sngi kala pynkup burom ïa u Bah Sosthenes Sohtun MLA bad MDC ka Jirang u ba la shah jied ruh dang shen ban rung haka kynhun Myntri ka sorkar jylla u ba bat ruh ïak tnad C&RD, GAD bad SAD, kaba long ka jingsarong kaba khraw ïaka district hadien bun snem ba kam shym la ioh bhah haka kynhun myntri sorkar.
Ïa kane ka jingpynkup burom la pynlong ha Parish Hall, Nongpoh, ha kaba la don ryngkat naduh u MLA ka Umsning u Dr. Celestine Lyngdoh, u MLA ka Umroi u Bah Damanbait Lamare, u MLA ka Mawhati u Bah Charles Marngar, ka MDC ka Nongpoh ka Kong Rona Khymdeit, u President ka NPP Ri Bhoi u Bah Clement Mawlong, ki nongialam na ka NPYF bad NPWF ryngkat kiwei kiwei ki nongïalam bad ki dkhot ka NPP na Ri Bhoi District.
Naka liang ka iing ka sem jong ka NPP ha Ri-Bhoi District ha kane ka sngi kila pynkup burom ruh da ki jaiñ ryndia, ki momentous ryngkat ki syntiew ban pynpaw ka jingsngewkmen kaba khraw ïaka jingioh bynta u Bah Sosthenes Sohtun haka kynhun myntri ka sorkar jylla, hadien bun snem ba ka Ri-Bhoi District kam don myntri sorkar, ryngkat ki jingkitbok ba un dang ioh ka met ba koit ba khiah ba un dang lah ban shakri kham bha ym tang ïaka Constiteuncy hynrei ïaka district bad ka jylla baroh kawei.
Haba kren ha kane ka sngi naka liang u Bah Sosthenes Sohtun u la ong ba ka jingai bynta jong u Myntri Rangbah ka jylla ban rung haka kynhun myntri ka sorkar jylla kam dei tang ïanga hynrei ïa ki 3 ngut kiwei pat ki MLA ka NPP kiba la treilang bad ai lang ka jingkyrshan ban don ka kynhun ba khlaiñ na Ri-Bhoi bad khamtam ban ioh bhah haka kynhun myntri namar ka Ri-Bhoi kam don myntri sorkar la kham slem.
U la ong ruh ba lyngba ka jingjied ïa u ban long u myntri sorkar ka dei ki dak ki shin ka jingkyrmen ba ka Party NPP kan dang khlaiñ ha Ri-Bhoi District, da ka jingsnohktilang ka jingkitkhlieh bad ka jingtrei shitom lang jong baroh naduh ki para MLA haduh ki nongkitkam.
“Kum u MLA bad MDC nga hap ban shakri hapoh ka constituency, hynrei kum u myntri sorkar nga hap ban shakri naka bynta ki constituency haka jylla baroh kawei” la ong u Bah Sosthenes da kaba bynrap ruh ba kumba la bynshet un lur bad trei ïaka kam naka bynta ka jingbit jingbiang jong ki paidbah haka district bad ka jylla baroh kawei.