Ka jingjia shah pynïap u nongwan jngohkai na Indore dei ban pynkyndit bynriew ïa ka jylla: Mukul

Shillong, Jylliew 06: U Nongïalam ka liang pyrshah u Mukul Sangma u la kyntu ïa ka sorkar jylla ban shim khia jur halor ka jingshah pynïap jong u nongwan jngohkai uba na ka Indore, Madhya Pradesh, ha ryngkat ba ka tnga jong u kaba la jah rngai katba ki dang wan honeymoon sha Sohra.
Katkum ka jingong jong u, kine ki shi kurim ki la jied ïa ka Meghalaya kum ka jylla kaba don ka jingïada na ka bynta kiba wan jngohkai.
“Nga pynpaw ka jingsngewlem halor ka jingduh noh ka jingim jong kane ka longïing longsem,” ïathuh u Sangma sha ki lad pathai khubor.
Haba ong ba kam dei ka por ban ïalehkai saiñ pyrthei, u Myntri Rangbah barim u la ong ba kane ka jingjia kadei ban pynkyndit bynriew ïa ka sorkar bad ïa ki paidbah jong ka jylla.
“Ka sorkar ka dei ban shim khia ïa kane ka jingjia. Ka lah ban ym dei ka jingleh jong ki dkhot jong kano kano ka seng lehnoh hynrei ka lah ban dei na kano kano kaba la dep don lypa ha ka jylla Meghalaya, kumta dei ban kyndit bynriew, ki nongshong shnong ki dei ban kyndit bynriew bad baroh dei ban kyndit bynriew,” u la ong.
U Sangma u la banjur ïa ka jingdonkam ban pyntreikam ïa ka Meghalaya Residents, Safety and Security Act, 2016 bad ban pyndait ruh ïa ki CCTV kiba la pynlong kongsan da ka aiñ.
Hynrei ka long pat kaba sngewsih ba wat ha ki police station kam shym la don ka jingpyndait ïa ki CCTV, u la ong.
U nongïalam ka liang pyrshah u la pynpaw ruh ka jingsngewkhia halor ka jingkiew ki samla kiba la kylla long ki lanot ban pyndonkam ïa u drok bad kumta donkam ban shim khia ïa kane ka kam.
“Haduh katno la ïoh ban kurup drok ha North East? Nangno kane ka pisa ka wan? Mano ba pynïaid ïa ka? Kumta baroh ki jylla kane ka thaiñ shatei lammihngi ki dei ban wanlang bad ban wad ki lad ki lynti ban pynpait pynpra ïa une u kynjri,” u la bynrap.