Ka jingjam shaphrang ban kyntiew ïa ka sap ka phong bad ka jingsengkam lajong ha ki thiañ nongkyndong ha Meghalaya

Shillong, Jymmang :Ka Meghalaya ka dei ka jylla ha ka ba bun na ki briew ki shong ki sah ha ki thaiñ nongkyndong. Watla ka kam rep kam riang ka long kaba kongsan bha, ha kine ki phew snem ba la dep, la don ka jingkynriah na kine ki kam rep kam riang sha kiwei pat ki rukom kamai kajih.
Ka jingduna jong ki lad kamai ka la pynlong ïa ki samla ba kin wan wad kam sha Sor. Haba shim ïa ki jingeh ba ki nongshong shnong ki iakynduh ha ka jylla, ka Sorkar Jylla ka la sdang ban pyntreikam ïa ki program ban ai mynsiem ban seng kam lajong bad ban ai jinghikai ban pyntbit ïa ki sap ki phong.
Bun na ki samla bad ki longkmie ki ba thrang ban long ki nong sengkam lajong, ki ïakynduh shibun ki jingeh ha ka jylla, na ka daw ka jinglong ka jaka, ka jingkyndong ka jaka, ka jingduna ki jinghikai bad khamtam ka jingbym don ka jinglam lynti ban pynhikai.
Ha kine ki snem ba la dep, ka Sorkar Jylla ka la thaw ïa ar tylli ki program na ka bynta ki nong sengkam lajong ba ki khot ki “PRIME HUB” ha Shillong bad Tura, ha kaba ki nong sengkam lajong ki lah ban wan ban ïoh jinghikai, ha kaba kin ïoh sam artat ia ki jingtip bad ki jingstad. Kine ki ar tylli ki Hub ki don ha ki thain Sor bad ki samla, ki longkmie bad ki nongrep kim lah ban ïoh jingmyntoi na ki namar ki jngai, ne ba heh palat ka jinglut bad kiwei kiwei ki daw ba mih na ïing na sem.
Kaei kaba donkam mynta ka kynti ka long ban pynbiang ïa kine ki nong sengkam da ka rynsan ha kaba ki lah ban ïoh jinghikai bad jingïalam haba ki sdang ïa ki kam jong ki. Ki nong sengkam lajong ki donkam ia ka jaka ha kaba ki lah ban leit ban ïoh ïa ka jingai mynsiem na ki stad ki jhad bad ki paralok, ban lah ban ïoh ïa ki jingtip, ki tiar trei bad rukom ban trei ter ter.
Ka jingdon jong ki jaka ban ai hikai ha ki jaka nongkyndong kan ïarap ban ïakhun ïa kine ki jingeh. Ka seng Sauramandala Foun dation, kaba dei ka sengbhalang ka la lah ban weng ïa kine ki jingeh ba ki thaiñ nongkyndong bad ki shnong ba jngai. Ka Sauramandala Foundation, ka la trei ha ki thaiñ nong kyndong ha Meghalaya naduh u snem 2019.
Da ka jingkyrshan ka Salesforce bad ka Smart Village Movement, ka Sauramandala Foundation ka la seng ïa ar tylli ki jaka ai jinghikai kum ka jingpyr-shang ba nyngkong. La ïoh plie ïa ki ‘Salesforce Trailblazer Labs’ ha Sohra rim bad ha ka shnong Nongwah ha u snem 2021 bad 2022. Kine ki ar tylli ki centre ki la pynsdang ïa ki kam bapher bapher kum ka jngshna sabon, ki miej, ki jaiñkup bad kiwei kiwei ki jingthaw ba la leh hi da ki riew shimet ba la pynwandur nyngkong da ki samla kiba wan sha kine ki lab.
Ha ba buddien ïa kine ki jingjop jong kine ki ar tylli ki centre, ka Saurmandala Foundation ryngkat bad ka jingkyrshan ka Sorkar Meghalaya kin ïatreilang bad ka Project DEFY ban thaw sa 20 tylli kum kine ki jaka ai jinghikai ha ki thaiñ nongkyndong ha kylleng ka jylla, kiba la khot ïa ki da ki ‘Chief Minister’s Youth Centres.’
Kine ki Centre ki thmu ban pynïoh ïa ki samla nongkyndong ïa ka jaka ba kin lah ban wad bad tip ïa la ka sap ka phong. Kawei pa kawei ka Centre kan don 3 tylli ki mat ha ka – ka jaka ai jinghikai ba ki khot ka Nook, ka computer centre bad ka library. Ka Nook kan dei ka jaka kaba don ïa ki tiar ban shna jingshna. Ha kine ki Nook ki samla na ki shnong ba marjan kin ïatrei ia ki kam ban pynbeit ïa ki jingeh ba ki briew ki ïakynduh ha ki shnong ki thaw jong ki.
Na ka liang ka Sauramandala Foundation ka kwah ban ïoh ïa ki aplikeshon na ki nongshnong shnong ka Meghalaya ban ïasnohkti ban seng ïa ki ‘Chief Minister’s Youth Centre’ ha ki District bapher bad ban thaw ïa ka lad ka lynti ban jam shakhmat ban kyntiew ïa ka sap ka phong bad ka jingsengkam lajong ha ka jylla Meghalaya.[Link na ka bynta ka application – https://bit.ly/nf_CMYC ] Phi lah ruh ban thoh sha : info@sauramandala.org