Ka jingïoh rung khlieh ki nongkhaïi ka la pynsniew ïa ka Saiñ pyrthei: Bah Witting Mawsor

Nongstoiñ, Naitung 18: Katba nang ïaid ki sngi ki por ki snem ki tyllun bad ki la nang ïaid na uwei u snem sha uwei pat, ka jingkylla ruh ka nang wan ha ka imlang sahlang, naduh ka pule puthi ka wad kam wad jam, khamtam eh ha ka kam Saiñpyrthei ne kam hima sima jong ka jylla Meghalaya.

Haba ïadei bad kane ka phang u bah witting mawsor MLA barim ka Mawshynrut konstitwensi, ha ka jingïakren bad u nongthoh khubor u la ong, “Mynta ka kynti nga ïohi ba ka kam hima sima ka la kylla bak la bak, kam ïadei shuh kumba ha ki por kiba mynshuwa, namar nga ïohi ba ka jingtreikam ka bor jong ka pisa, ka la nang rung ha man la ki konstitwensi bad wat sha ki thaiñ nongkyndong ruh lait noh katto katne”.

“Ki paidbah mynta kim sngap shuh ïa ki mat jingdonkam lane ki ishu jong ka jaidbynriew. Hynrei ki ap dngong tang ïa uno u ba lah ban ai ei ei, ïa uta hi ki jied ban long nongmihkhmat bad kane ka la pynkhlumar ïa ki paidbah”, bad bynrap, “Uno uno uba nang ba stad bad u ba don ïa ki jingtip kaba kham bha, um nud shuh ban rung ha ka jylli ka kam saiñ pyrthei, namar ba um don pisa bad kane kan pynjot ïa ka jaidbynriew. Ka shong satang ha ka jingstad jong ki paidbah ban pynkylla biang ïa kane ka jinglong jingman”.

“Ha u snem 2023 ruh kan ym don kano kano ka sorkar ka ban lah ban synshar marwei, hynrei kan wan biang ka sorkar synrop bad nga tip shai ba ka seng HSPDP ruh kan ïoh ban ïadon bynta lang ha ka sorkar, namar ngi ïohi ba ki kyrtong jong ngi kin don bun ngut ki ban sa jop”.

Shuh shuh u la ong ruh, “Ym don uno uno u lok ne nongshun u ba neh junom ha ka Saiñ pyrthei. Ngim lah ban len ba ka kam Saiñpyrthei ka la kylla shisha ha kane ka jylla baieid jong ngi. Katba nang ïaid ki sngi ki por, ki snem ki la tyllun bad ki la nang ïaid na uwei u snem sha uwei, ngi ïohi ruh ïa ki briew ka Saiñ pyrthei ki khih phaloh bad ki kynrup ruma kat shaba lap, ki kdup ruh kat ïa uba mon bad ka jingthmu hi ka long beit tang ban jop bad ban kput ïano re ïano ym ban shakri ïa u paidbah”.

“Ka jingshaniah ha la ka ïing kam don shuh bad ki ryngkoh na kawei sha kawei pat ka seng, da ka jingmutdur ban ïoh ïa ka jingjop da kaba kyntiap seng, hynrei haba ngi puson bha, ngi lah ruh ban buh jingkylli da kaba ong lada ka seng Congress kaba dei kawei na ki seng kaba heh tam ha ka jylla, ka kylla ka seng kaba rit tam, hawto kam jia mo ïa kiwei pat?. Ngeit ba ka por hi kan batai bad ai ki paidbah hi kin khmih bniah ïa u masi lur bad u masi tur mano ban kham lah napdeng kine”.

Haba kylli kumno ka seng Congress naduh ki por u maieid Hopingstone, ka dei kawei na ki seng kaba ïashun bha pynban mynta pat da u briew ka Congress ka pynïeng na Mawshynrut konstitwensi, u Bah Mawsor u la ong. “Ha ka Saiñpyrthei ym don uno uno u lok u ba neh junom bad uno uno u Nongshun ruh u ba neh junom. Ngi don ruh ka jingkyrmen skhem ba u Sing un jop beit mynta ha Mawshynrut”.