Ka jingioh Myntri u Bah Sosthenes ka dei ka jingsarong ïa ka Ri-Bhoi, pynkup burom ka SRS Byrnihat

Nongpoh, Risaw 13: Ka Synjuk ki Rangbah shnong, Byrnihat Area, mynta ka sngi da ka jingsarong kala pynkup burom ïa u Bah Sosthenes Sohtun halor ka jingshah jied jong u ban long kum u Myntri ka sorkar jylla, haka jingïalang kaba la long ha Byrnihat haka jingdonlang ki nongïalam ka Synjuk naduh u Bah Kendrowell Lapang Chairman, Bah Johny Syiem Secretary, ryngkat ki Rangbah Shnong naki shnong bapher bapher ka thaiñ Byrnihat.
Na ka liang ki nongïalam shnong ka thaiñ Byrnihat kila pynpaw ba ka jingioh myntri u Bah Sosthenes Sohtun ka dei ka jingsarong kaba khraw ïaka dong Ri-Bhoi baroh kawei hadien bun snem ka Ri-Bhoi kam shym la ioh bynta satia haka kynhun myntri ka sorkar jylla.
U Bah Sosthenes Sohtun kum u Myntri ka tnad C&RD ba dei ruh u MLA bad MDC ka Jirang u la pynpawka jingsngewkmen kaba khraw halor ka jingkynmaw burom ki nongïalam shnong, hadien ba u la shah jied ban long kum u myntri sorkar khamtam ïa u Myntri Rangbah ka jylla u ba la ailad ïa u ban rung lem haka kynhun myntri.
Kum u myntri bad MLA ka thaiñ u Bah Sosthenes u la kular ruh ban trei shitom bad trei hok ïaka kam kumba la bynshet ha u, ryngkat ka jingkyntu ïaki Rangbah Shnong ban ai ka jingïatreilang khamtam ki thaiñ khappud bad ka Assam ban peitngor ïaki kam sniew kam smeh, ka jingrung kyrthep ki mynder, ka jingshah rah bor bad shah pyniap ki khyllung khynnah bad kiwei kiwei namar dei tang ka jingïatreilang kaba lah ban rat diengkhong ïa baroh ki kam sniew ha kane ka jylla.