Ma Lahkmen Rymbui, MLA ka War Jaiñtia, uba dei ruh u myntri ka tnat pule puthi, ula kren ïa ka mat kaba donkam bha bad kata ka long, ba ka T.2.5klur kam pat ïahap satia, ïa ki MLA, ba kin bei pisa sha u paidlang, uba jied ïa ki bad lada peit shwa ïa ka Amlarem Constituency, kaba ula jop salit U Ma Rymbui, ha ka elekshon 2023, ka don haduh 39 hajar ngut ki nongthep vote bad ha u snem 2028, kan tam khlem pep ïa ka 40 hajar ngut eiei.
Na kaei kaba ki MLA, ki ïa sam skhim mynta, la ïohi, ba uwei uwei u nongthep vote, uba kyrshan, u ïa ïoh hapdeng ka T.10 haduh T.15 hajar marwei bad na katei ka jingkheiñ, ka pyni, ba ha ka shisnem, ki ban ïoh jingmyntoi kin long tang 2,000 ngut bad u ma Rymbui, u ïoh vote 17 hajar antad ha u 2023 bad lada un sam tang sha kiba kyrshan ïa u, kumta katei ka T.10 hajar kam lah ban pyndap wat tang ïa ki 10 hajar ngut ki nongkyrshan jongu bad katei ka pyni, ba un donkam sa lai snem tam, ban pynïoh skhim ïa kitei ki 17 hajar ngut lane kaba mut ba u donkam ban ïoh long MLA 8 snem bad ban sam ïa ka T.10 hajar sha baroh ki 17 hajar ngut ki nongjied jong u lane ba ka skhim kan dei ban kiew noh sha ka T.4 klur antad ha ka shisnem bad ka ban long T.20 klur ha ka san snem.
Haba phai sha kiba bun ki jingeh jong ki constituency la shem ba kane ka skhim ka dang long kaba duna bha kumta la donkam ïa ka sorkar ba kan khmih biang ïa kane ka jingai bhah ïa ki MLA.
Na ka liang jong ka sorkar ka la dei ban shim khia ha kaba ïadei bad kane ka bynta na ka bynta ka jingbha jong ki paidbah ha kane ka jylla baroh kawei.
ïa kane ka mat la ïakren ruh la bun sien hynrei ym pat lah pat ban rai ïa ka jingdonkam jong ka MLA skhim kaba dei ka jingmyntoi jong ki paidbah na ka por sha ka por.
Lah ban ong ba kane ka skhim kaba 2 klur ka dang shisha kaba dang duna bha haba ïa nujor bad kiwei ki constituency khamtam kiba dang dang donkam bha ki lad jingpynroi ha kiba bun ki liang.
Ki don katto katne ki constituency kiba duna ki jingheh jaka jong ki kum ka 17 North Shillong Constituency bad kiwei pat ki katto katne ki constituency, nangta ka nuksa kum ka Mawlai Constituency kaba dei kawei na ki constituency kaba heh tam kadei kaba dang donkam ban ïoh ka jingpynheh ïa ka MLA skhim ne kaba dei ban ïoh palat ïa ka 2 klur tam khnang ba kan lah ban ïarap ïa kiba bun ki longïing kiba dang donkam ki lad jingïarap kiba manla ka sngi.
Ha ki por kiba la dep ki la don ruh katto katne ngut ki nongmihkhmat kiba la dawa ba ïa kane ka bhah dei ban wanrah noh ka jingkylla khnang ba kan ïarap ïa ki bad khamtam ïa ki paidbah nongshong shnong, namar ka 2 klur tam ka dang long kaba duna bha haba nujor bad ki jingdonkam ba manla ka sngi kaba ki paidbah jong ki constituency ki wan ban ud ban nam na ka por sha ka por bad manla ka sngi ha ki ïing jong ki nongmihkhmat la ki dei ki MDC ne ki MLA.
Kumta kiba bun na ki, ki la pynpaw ïa ka jingkhuslai ban ïarap ïa ki paidbah kiba wan ban ud ban nam manla ka sngi, khamtam ha ki constituency kiba hab ha ki thaiñ nongkyndong naba bun na ki nongshong shnong ki ap bad angnud beit ïa ki jingïarap na ki MLA ne na ki MDC ha kiba bun ki liang bad ki jingdonkam kiba manla ka sngi jong ki.
Shuh shuh lah ruh ban ong ba bun na ki nongmihkhmat kila pynpaw ruh ïa ka jingdonkam jong ka sorkar ban pyrkhat ban pynheh shuh shuh ïa kane ka MLA skhim naba ka dang long kaba dang duna palat bad bun na ki MLA ki hap ban sei na la pla la jong ruh ha ka por ba ki nongshong shnong ki wan ban wad ïa ki lad jingïarap jong ki jan manla ka sngi.
Lah ruh ban ong ba ha kine ki por bad ki sngi ba la leit bun na ki nongshong shnong kim ïoh ruh ki lad jingïarap na ki MLA skhim ne kiwei pat ki lad jingïarap naba bun kim tip ne don lynti ban leit ban kynduh ïa ki nongmihkhmat ne ba kim don ki jingïadei ba jan bad ki.
