Shillong, Naiwieng 17 : Ha kaba ïadei bad ka jingjia aksiden ha ka janmiet Sngi Thohdieng ha Umsaw hajan ICAR ha ka por 5.30 pm ei ei ha kaba la kynnoh ba tynrah ka kali secutiry jong u myntri ka tnad kam jngohkai, ki don ki nongsakhi kiba kwah ban ïathuh ïa ka jingshisha.
Uwei na ki nongsakhi uba don hajan katei ka jaka ha ka por ba jia katei ka jingjia uba dei na ki thaiñ Bhoi hynrei u bym kwah ban pynpaw kyrteng ïalade, haba kren lyngba ka phone sha ki lad pathai khubor u la ïathuh ha katei ka por katba u dang ap paralok naka bynta ban ïaleit lang sha ka tamasa Cherry Blossom, ka jur bha ka jingdheng kali, bad la wan ïaid ki kali jong ki heh sorkar kaba synran da kawei ka kali pulit nakhmat bud sa ar tylli ki kali jong ki heh sorkar nangta shadien pat don haduh san lane hynriew tylli ki kali jong ki pulit kiba bud nadien. Ha katei ka por la wan ka thuk thuk kaba bud nadien ba ïaleh ban knieh khmat ïa kitei ki kali synran jong ki heh sorkar, la ïohi ruh ba u pulit napoh kawei ka kali ba u rah kti khnang ba ka thuk thuk kan ym tur, hynrei la ïathuh ka thuk thuk ka tur beit bad namar ba dheng kali la pynsuki noh u nongñiah jongka kali ba bud ïa ki heh sorkar bad dei ha kum katei ka por ba u nongñiah thuk thuk u la leit tynrah beit na ka tyre ba shadien jongka kali Thar bad kumta u nongniah ka thuk thuk um lah shuh ban telakam ïa ka thuk thuk ka la poi sha kawei ka liang ba wan kiew pyrshah ka kali bad ha kum katei ka por la wan kawei ka kali ba kiew na sharum kaba la tynrah ïa katei ka thuk thuk bad phet bak . Une u nongsakhi u ïathuh ba ym dei satia ba tynrah ka kali ba synran ïa ki heh sorkar hynrei dei ba shah tynrah ha katei kawei ka kali kaba ïoh ruh ban phet bak na katei ka jaka. Ki kali jong ki riew shimet kiba ïohi pat ïa kane ka jingjia ki la ïa sangeh bad ïarap bad pynkit sha jaka sumar ïa utei u samla hynrei sniewbok u la khlad noh hashen.
Kawei pat ka jingkynthoh kaba mih halor katei ka khubor hi ha ki social media ka ong “ Hooid wat la kata ka jingkam jongkane ka media ka kynthoh ïa u myntri ka tourism hynrei lada ngi peit bha ïa ki caption ka batai shai ba kane ka escort car ka dei kaba bud ym kaba ïalam bad kat kum ka jingïohi jong ngi ha kane ka sngi ka long kumne.. Na ka kali u Myntri sha ki kali escort la don lypa 5 ne hynriew tylli ki kali hapdeng ta ka daw ngim lah ban shu kynnoh ïa u myntri ruh, hooid nga ktah ka mynsiem ban duh noh ïa u para doh para snam lade hynrei ka jingiapynher kali ha katei ka sngi kane ka kali ar shaka ka la kum tynrah nadien jong katei ka escort bad ha ka jingbym lah tehlakam shuh jong u nongniah arshaka ka la leit sha ka wrong side bad ka la tynrah ïa ka kali kaba wan na ka opposite lane mar pyrshah, ta ka daw shwa ban jrong ka story nga shu kwah ban pynshai ïa kaei kaba jia ha katei ka sngi ym dei ba nga ïashah ïa ki high level hynrei nga shu kwah ban pynshai khnang ba phin sngewthuh ïa kaei kaba phi shu ïa ïohsngew pateng…. ta kadaw shwa ban ïa comments sngewbha ïit shwa ïa ka jingshisa namar ka jaidbynriew jong ngi kan sa jot lada ngi ïai long sah kumne. Map ïa nga lada nga la kren tam ne pynsngewsih ïano ïano bad ïa une u samla khasi jong ngi uba la duh noh ka jingim nga duwai ba U Blei un ïai bat skhem ïa phi bad ba un kyrkhu ïa ka ïing ka sem jongphi Rest in Peace brother God be with you”.
Lah ban pynkynmaw ba u samla uba khlad ha katei ka jingjia u dei u samla Hudderfield Rymbui uba dei na ka shnong Nongtalang tangba u sah ha Nongrah hangne ha Shillong, bad ka samla kaba mynsaw jur kaba shong lang bad u ha ka thuk thuk ka dei ka Daphi Kharbithai na Nongthymmai. Kine baroh arngut ki dang mut ban ïaleit sha ka tamasa Cherry Blossom ha Bhoirymbong kaba sdang ha katei ka 15 tarik Naiwieng 2024.
