Shillong, Iaiong 28 : U Myntri Rangbah duh ka ri u Narendra Modi haba kren mynta ka sngi ha ka jingleit jngoh ïa ka Dephu, Karbi Anglong u la ong ba ka jingïasoi soskular ne Memorandum of Understanding (MoU) hapdeng ka Meghalaya bad Assam na ka bynta ban pynbeit ïa u pud u sam kaba la sahteng la 50 snem mynta kan long kum ka nuksa ban ai mynsiem ïa kiwei ki jylla ruh ban ïapynbeit ïa u pud u sam jongki.
Ha kane ka jingleit jngoh ba shisngi ïa ka Diphu u la buh maw nongrim ïa kiba bun tylli ki projek kiba shongdor haduh 500 klur tyngka kiba kynthup ïa ka Veterinary College ha Diphu bad ka Degree College ha West Karbi Anglong bad ka Agricultural College ha Kolonga.. U la hiar ha ka kad liengsuiñ Dimapur bad na katei ka jaka u la her da ka Helikopter sha Diphu bad kren ha ka jingïalang paidbah.
Haba kren haka jingïalang u la ong ba ki jylla kiba don ar tylli ki enjin ka kam ruh ka kloi bha. U la ong ba ha u snem ba la dep kiba bun ki kynhun kieng atiar ki la ïasoi iaka Bodo Accord ban pynneh ïa ka jingshongsuk shongsaiñ. U la ong ba dang shen la weng noh ïa ka Armed Forces (Special Powers) Act na ki 23 tylli ki district jongka Assam. Dei hangne ruh ba ula ong “ Ka jingïasoi soskular pynbeit pud hapdeng ka Meghalaya bad Assam ka long da ka mynsiem Sabka Saatth Sabka Vikas bad lyngba kane khlem pep kin lah ban pynbeit ïa u pud u sam bad kane kan long ruh ka jingai mynsiem ïa kiwei pat ki jylla ruh”.
Mynta ka sngi ula plie ruh da ka video conference ïa ki 7 tylli ki cancer hospital ha Assam bad kine ki dei ki ban don ha Dibrugarh, Barpeta, Tezpur, Jorhat, Lakhimpur, Kokrajhar bad Darrang.
