Ka jingïasiat khnam ka jingïalehkai tynrai u Khasi ba ki ju khot ka “Rongbiria u Khasi” jong ka mynnor

Mawkyrwat, ‘Naitung, 21: Ka long kaei kaei kaba sngewtynnad ban tip bad ïohi ba ki briew jong kane ka juk ba mynta ki la dang pynneh pynsah bad pynkhie im biang ïa ka kam ïa siatkhnam kaba long kawei na ki kam ïalehkai rongbiria jong u shynrang khasi ka mynnor ha kaba kane ka la jia ha kawei na ki shnong ha Nongnah, Maw-en-deng kaba hap hapoh jong ka Ranikor C&RD Block, South West Khasi Hills District.
Lah ban kdew khyndiat ba la ju tip shaphang ka jingsiatkhnam ba u ‘rang khasi jong ka mynnor ba ka sotti juk ka dang ïeng rasong, ka jingïasiatkhnam ka dei ka jingïalehkai Tynrai jong u Khasi kaba ki ju khot ka “Rongbiria u Khasi”, hynrei ha kine ki sngi ki la jan duh jait noh bad kane ka jingïalehkai ka don sa tang katto katne ki jaka kiba dang pynneh ïa kane ka jingïalehkai ba la tip kum ka jingsiat tim ha Polo lane ka Shillong Teer bad katto katne ha ki lympung lehkmen bapher bapher ba la pynlong da ka sorkar.
Halor kane ka jingïasiatkhnam, khyndiat ngin ïa phai sha ka shnong Nongnah, South West Khasi Hills District ha kaba kum shibynta ban pynneh pynsah ïa ki matti ki longshuwa manshuwa kane ka shnong ka dang pynneh pynsah ïa kane ka jingïalehkai. Ka jingïasiat khnam ha shnong Nongnah ka neh naduh ki por hyndai kulong kumah haduh mynta mynne ki sngi jong ngi ba ki ‘riew tymmen ki ju ïalehkai ïa kane ka jingïalehkai siatkhnam bad mynta kane ka jingïasiatkhnam ka dang khie im ha kane ka shnong, hynrei katkum kane ka juk ki Khristan mynta ha kane ka jingïalehkai kam don shuh ka kñia ka khriam hynrei la pynlong pat ïa kane ka jingïalehkai kum ka kynja jingïalehkai tamasa ne ïalehkai kmen.
Kaba sngewtynnad ka long ba ki briew ha kane ka shnong ki ieit bha ïa kane ka jingïalehkai bad ki ju sngewtynnad ruh ban ïa siatkhnam bad ym don khynnah ym don rangbah baroh ki briew ha kane ka shnong ki nang lut ban siatkhnam bad man kawei pa kawei ka longïing ki don beit u khnam ka ryntih.
U Mawphor dang ha kine ki khyndiat sngi u dang sakhi ïa kane ka jingïalehkai bad ka la ïoh ruh ban ïa kren bad ki katto katne ki rangbah kiba seng bad kiba pynïalehkai ïa kane ka tamasa jingïa-siatkhnam ha kaba manla ka taïew ki ju pynlong ïa kane ka jingïalehkai kata ka long shisien shitaïew ki ju pynlong ïa kane ka jingïalehkai kaba dei beit tang ha ka sngi saitjaiñ. Shuh shuh la ong ruh ba mynta ki jingïalehkai siatkhnam ki la don la ki aiñ ba ki nongseng ïa kane ki buh bad pynbeit katkum ki kyndon (rule and regulation).
U Bah u Shlurding Riamsiej u la ïathuh ba kane ka jingïasiatkhnam jong kane ka juk ba mynta ka la don ka jingïapher bak-ly-bak bad ka juk kaba mynshwa, namar mynshuwa shwa ban sdang ïa ka jingïasiat thong ki da don ki nia ki jutang da ki ‘riew tymmen hynrei mynta pat ka la long kum ka bynta jong ka jingïalehkai ne sports bad ym dang donkam shuh ïa kita ki nia ki jutang. U la ong ruh ba khnang ba kane ka kam ïalehkai siatkhnam kan neh kan sah, kum ka shnong ka ju pynlong da ka lympung ïalehkai ha kaba ki nongïasiat shynrang ki ju mih sha madan ban pyni ïa ka sap ka phong ba ki ki don.
Katba u bah Kynpham Lyngkhoi pat u la batai khyndiat shaphang ka rukom ïasiat namar ha ka lympung ki hap ban don ki kyndon ba ki nongïakhun kin hap ban tip kata ha ka jingsiat kaba nyngkong ki ïasiat baroh ar liang ha kaba na kawei ka liang ki don beit mar lai lai ngut bad shihali (saw tylli) u marwei briew bad ar liang ka long phra tylli ki khnam. “Ha kane ka jingïakop ïasiat khnam kum ki nongpynïaid ki la buh ruh ïa ki khusnam na ka bynta ki nongjop ha ki bynta bapher bapher katkum ka jinglah jong ki”, ong u bah Kynpham Lyngkhoi.