Ka Seng BJP kadei ka Party kaba kham don ka discipline na kiwei pat ki Political Party ha ri India. Kadei kane kaba la pynlong ïa kane ka Pary ba kan nang kiew nang kiew katba nang mih ki sngi, ha kaba la ïph bat syndon ar samoi lynter ïa ka jingsynshar ha ri India. Nangta la ïohi ruh ba ka la ïoh knieh ïa ka jingsynshar ha ki jylla jong ka ri India na ka jingsynshar jong ka Seng Congress. Wat ha ki jylla kiba la thaw sorkar da ka Congress kum ha Madhya Pradesh, ha Maharashtra, nangta ha Karnataka ba synshat da kiwei pat ki Party ruh ka la ïoh knieh noh shiteng por ïa ka jingsynshar.
Ym ju kham ïohi ruh ba kan don ka jingïadait ïashrut hapdeng ki Nongïakam jong ka Party lait noh hateng hateng. Hynrei kumba ïohi hi kadei ka Party kaba ïa burom iwei ïa iwei bad khamtam ïa ki nongïalam ym kham don kiba nud ban beiñ ne ban kynthoh. Ki bym ïahap ïa ka rukom treikam jong ka Party ki mih noh, kumba long u Yashwant Sinha, uba long u Kyrtong President jong ka ri India mynta.
Hynrei hangne ha jylla Meghalaya, la ïohi ba ka la don ka jingïadait ïashrut kaba jur ha ka Seng BJP. Ka jingïakynad kaba i shyrkhei ka long hapdeng ki MLA syndon kiba don tang arngut, kata u Bah AL Hek bad u Bah Sanbor Shullai. Kane ka jingïakynad hapdeng kine ki arngut ki MLA ka la bthei shabar hadien ka jingwan ka kyrtong President jong ka Party sha Meghalaya, ka Draupadi Murmu ban pan jingkyrshan na kiwei pat ki Party ha kane ka jingïajied ïa u President ba thymmai jong ka ri India.
Kane ka jingïakynad hapdeng ki arngut ki MLA ka Party ka long hadien ba u Bah Sanbor Shullai, u la wohdong ïa ka jingkren u Bah Metbah Lyngdoh, President ka UDP bad u Speaker ka Meghalaya Legislative Assembly ha kane ka sngi ba wan ka Murmu. U Bah AL Hek udei uba nyngkong ban pynpaw paidbah ïa kane ka jingwohdong jong u Bah Sanbor ïa u Bah Metbah. Imat dei kane kaba la wanrah ïa ka jingïashrut ha kine ki arngut ki MLA jong ka BJP, namar dei hadien ka jingpynpaw u Bah Hek sha ki lad pathai khubor ba u Bah Sanbor u la khih tik ban khyrwit kylla ïa u Bah Hek.
Hynrei wat shuwa jong kane ruh ka la don ka jingïakynad ha ka Seng BJP ha Meghalaya,khamtam hadien ka jingshimti u Bah Ernest Mawrie kum u President, ha kaba wat u Bah Sanbor Shullai ruh u la wohdong ïa ka jinglong President u Bah Mawrie, namar ba u ju ther ha ki kot khubor ïa ka jingtreikam ka sorkar MDA, kaba ka BJP ruh ka ïatreilang. Ki la bun ruh kiba la khih ban pynhiar shuki ïa u Bah Ernest Mawrie, hynrei kim shym la lah. Pynban kaei kaba jia hadien kane, ka long ba u Bah AL Hek, u la shah weng noh na ka kynhun Myntri bad ha ka jaka jong u la thung nih da u Bah Sanbor. Imat u ingtyrkhong u la sdang naduh katei ka por.
Satang kumba 6 bnai ei ei ban poi sha ka jingïajied thymmai ïa ki MLA bad ka BJP ka la projek bha ïalade da kaba kam ruh ba ki don ki MLA ba mynta kiba na kiwei pat ki Party kiba la wan ban pan tiket ban ïakhun ha kane ka elekshon 2023. Tip kane ka Party kan lah mo ban leit sha kane ka elekshon da ka jingïatylli bad ka jingïatreilang bad lada ka leit ruh hato la ka jingïatreilang bad jingïatylli kan long kaba khuid ne kaba shu tang na sla? Ka por ne ka result jong ka elekshon 2023 na ka bynta ka BJP kan sa batai ïa kane.
