Jowai Nohprah 08: Ha ki ar snem kiba la dep na ka daw jong ka Covid 19 (Corona virus) ka Parish Jowai kam shym la lah ban pynlong ïa ka Proseshon Iukharist kumba ju long shisien shisnem, ha kane ka snem 2022, ka Proseshson Iukharist jong ka Parish Jowai kan long ha kane ka 11 tarik mynta u bnai (11/12/2022), ha sor Jowai.U Phadar Hilarius Lamare Parish Priest ka Parish Jowai, u ong ba ka jingpynkhreh ïa kane ka Iukharist Proseshon ka la ïaid shait shait da ki jingduwai pynkhreh (Tridum) bad mynta ka sngi ki paidriewngeit ka sor Jowai kila ïa mih paidbah hynne ka sngi (08/12/2022) ban pynkhreh ïa ka jingïaid beit ïaid ryntih jong kane ka Proseshon Iukharist.Ha ka 11 tarik shwa ban ïaid ïa ka Proseshon Iukharist hapoh ka sor Jowai, ha ka por 10 baje porstep (10.00 AM) yn don ka jingkñia Mass Iukharist, ha kaba u Phadar Ferdinand Dkhar Diocesan Administrator ka Jowai Diocese un long u Nongkñia Rangbah duh ha ka jingïasynran lang kiwei de ki Phadar (Lyngdohsohblei) na ki Parish bapher bapher jong ka Jowai Diocese bad kiwei de ki Phadar (Lyngdohsohblei) ki ban wan na ka Jylla-ñiam bah Shillong (Archdiocese Shillong) bad na ka Diocese Nongstoiñ.Ka Proseshon Iukharist kan sdang thik ha ka por kumba shibaje shiteng nohphaisngi. Ki Phadar ka Parish Jowai bad ki paidriewngeit ka Parish, ki khot sngewbha ïa ki para bangeit na ki Parish bapher bapher ba kin ïa wan shim bynta ha kane ka Proseshon Iukharist ka Parish Jowai.
