Ka jingïaleh politik ha kano kano ka party kadei ka jingsdang jong ka jingjot jong ka party : President UDP

Shillong, Nailar 24 : U President Rangbah jong ka United Democratic Party (UDP) Bah Metbah Lyngdoh u la ong ba ka jingpyrshang ban ïaleh politik ha kano kano ka party kata hi kadei ka jingsdang jong ka jingjop ha kato ka party.
Haba kren ha ka jingïalang pynthymmai ïa ki nongkitkam jong ka UDP South West Khasi Hills kaba long ha Mawkyrwat ha ka sngi Saitjain, u Bah Metbah u la ong, “Ka jingïaleh politik ha kano kano ka party ka long ka jingsdang jong ka jingjot jong kano kano ka party.”
Kumta, u la ong ba kum u nongïalam rangbah jong ka party um kwah satia ban ïohi lane ailad ba kan don kum kata ka jingleh politik ha ka UDP.
Shuh shuh u ong ruh ba u sngewskhem ba ka jingïalang jied nongkitkam ba thymmai jongka distrik kaba long ha kane ka sngi kadei da ka jingïa mynjur lang da baroh. “Kaei kaba nga ïohi ka long ba phi shaniah ha kita ki nongmihkhmat kiba phi la jied kata ïa u Bah Renik Lyngdoh bad u Bah Pius Marwein.”
Nangta, u President u la ong ruh ba katei ka distrik kadei kaba donbok haduh katta katta ba ki don u MLA na ka party ym kum ha kiwei ki jaka kiba kim don ïa u nongmihkhmat na ka party.
“Haba nga leit sha ki distrik bad ki constituency ki bym don ïa ki MLA (UDP) teng teng nga isynei haba nga peit ïa ki nongkyrshan jong ka party namar kim don ïa ki nongmihkhmat ne ki MLA na ka party. Ki nongkyrshan ki don ka jingshaniah tylli tyllan la ka long ha kano kano ka rukom, ha ki nongmihkhmat jong ki,” bynrap biang u Bah Metbah.
Shuh shuh u la ong ruh ba ha ka jingai tiket ha ka por elekshon MLA kaba ïadei bad ka South West Khasi Hills District kan ym don kano kano ka jingpynbor na uno uno u riewshimet hynrei ka party kan shim barabor ïa ka sur u paidbah uba bun balang ha ka party.
U President u la ong ruh ba ha shwa ka elekshon MLA ha u 2023 ki la khmih lynti kumba 18 – 19 ngut ki kyrtong kiban jop hynrei kam shym long kumta. “Hynrei to, ngi hap ban pdiang ïa ka rai jong u paidbah,” la bynrap biang u President.
Ha kane ka jingïalang pynthymmai ïa ki nongkitkam ka South West Khasi Hills district la donlang ruh naduh u General Secretary ka party, Bah Titos W Chyne nalor kiwei kiwei ki nongïalam jong ka party.