Ka jingïalap elekshon ka dei ban long beit ha u pud u sam ki constituency, ong u Commissioner DCA

Shillong, Rymphang 18: Ka sorkar jylla ha ka sngi baar ka la pynshai ba ki kam ïalap elekshon ka dei ban long beit tang hapoh u pud u sam jong ki constituency kiba la ïoh bor bad ïoh jingbit na ka tnat kaba dei peit.
“Yn ym shah satia ïa ki kam ïalap elekshon shabar jong u pud u sam ka constituency. La dep ban pynbna ïa ki Polling station bad ki shnong ki thaw kiba hab hapoh KHADC bad JHADC, ha kaba ki la don tang khyndiat ki jingpynkylla ha kaba ïadei bad ka jingphiah ïa ki jaka. Baroh ki kam ñiew vote ki dei ban long beit hapoh ki constituency,” ong u Commissioner & Secretary ba khmih ïa ka tnat District Council Affairs (DCA) u Bah Cyril Diengdoh.
Kane ka jingong jong u, ka la mih hadien ba ka la don ka jingmih khubor ba u kyrtong uba ïakhun ïa ka elekshon na Jaiñtia Hills Autonomous District Council (JHADC) ha Meghalaya u la leit ban ïalap ïa ka elekshon hapoh u pud u sam ka jylla Assam. Ka khubor ka ïathuh ruh ba u kyrtong bad ki nongkyrshan jong u ki la ïaid kumba 25 kilometer shapoh ka West Karbi Anglong district bad ki la leit ban ïalap elekshon ha ki jaka ba ïakajia pud kaba ha Makro bad Umkhremi kaba dang don hapdeng u pud u sam ka Assam-Meghalaya. Lah ban ong ba ka elekshon ha JHADC kan long ha ka 21 tarik mynta u bnai.
Halor kane ka jingkynnoh u Bah Diengdoh u la ong ba ïa kane ka kam dei ban don ka jingpynshai kaba biang. “Ngim pat ïoh jingtip halor kane ka kam kumta ngam lah ban kren shai halor kane. Lada ka kam ïalap elekshon ka dei hapoh shnong Mukroh, ngam lah ban ong eiei naba ka hab ha Meghalaya. Hynrei ngan hap pat ban wad ki jingshisha ban pynthikna ïa kane ka jingkam,” u la bynrap.
U la ban jur ruh halor ka jingdonkam jong ki kyrtong ban ïoh ki jingbit na ki returning officer bad Deputy Commissioner ha kaba ïadei bad ki jingpynlong ïa ki jingïalang paidbah, ki rally, ne procession. “Ki DC ki la tip bha ïa u pud u sam ha kaba ïadei bad kine ki jingai jingbit. Lada ki kam ïalap elekshon ki don ki dei ban bud ïa ka Model Code of Conduct (MCC),” u la ong.
U la ong ba ki jaka ñiew vote kiba don jingma bad ki bym don jingma ki long ha KHADC na ka 1,669 ki polling station, 88 tylli ki dei kiba shngaiñ bad 16 tylli ki dei kiba don jingma bad kumba 25 tylli ki dei kiba kham don jingma shuh shuh. Ha JHADC ki 477 tylli ki polling station, 95 tylli ki dei kiba shngaiñ.
Ha Sohra Civil Subdivision, na ki 95 tylli ki polling station 3 tylli ki dei kiba don jingma, ha Eastern & West Khasi Hills, na ki 141 tylli ki polling station, 10 tylli ki dei kiba don jingma, ha Pynursla, na ki 103 tylli ki polling station baroh kidei kiba shngaiñ, na Ri-Bhoi, na ki 432 polling station, kumba 14 tylli ki dei kiba don jingma bad 16 tylli ki dei kiba shngaiñ, ha East Khasi Hills na ki 733 polling stations, 31 tylli ki dei kiba shngaiñ, 1 ba don jingma.
Ha Nongstoiñ na ki 146 polling stations, 1 dei ban don jingma bad 28 tylli ki dei kiba shngaiñ, ha Mawkyrwat na ki 120 tylli ki polling station, 25 tylli ki dei kiba don jingma, ha West Jaiñtia Hills laitnoh ka Amlarem, na ki 241 tylli ki polling station, kumba 47 tylli ki dei kiba shngaiñ, ha East Jaiñtia Hills, na ki 168 tylli ki polling station kumba 40 tylli ki dei kiba shngaiñ bad ha Amlarem na ki 68 ki polling station, 8 tylli ki dei kiba shngaiñ.
La pynjur ruh ïa ki bor pahara ha baroh ki polling station kiba don jingshngaiñ bad ki ba don jingma.
La ong ruh ba ka sorkar jylla ka la mang T. 22 klur na ka bynta ban pynlut ha kane election MDC kaba mynta u snem.