Ka jingïakren bad ka Sorkar kan ym ktah na ka jingshah pynngat kyndon ki heh HNLC: CM

Shillong, Nailur, 07: U Myntri Rangbah ka Jylla u Conrad Kongkal Sangma ha ka sngi Balang u la ong ba ka jingïakren hapdeng ka Sorkar bad ka seng kieng atiar Hynñiewtrep National Liberation Council (HNLC) kan ym ktah satia wat lada ka National Investigation Agency (NIA) ka la pynngat kyndon ïa ki saw ngut ki heh nongïalam ka HNLC halor ka jingpynbthei ïa u bom Improvised Explosive Device (IED) ha u Nohprah 2020 ha phyllaw ka Star Cement ha East Jaiñtia Hills.
Ki saw ngut ki heh nongïalam ka HNLC kiba la shah pyngngat kyndon ha ka NIA ki kynthup ïa u Marius Rynjah, ba ju khot sin Hep Koit, uba dei u Finance Secretary jong ka HNLC, uba la dawa pisa ha ka kyrteng ka Seng na ka Star Cement. U Marius Rynjah u dei u nongshong shnong jong ka Baranumber (Barapunjee), Bangladesh.
Lai ngut kiwei pat ki kynthup ïa u Emmanuel Suchen, ba ju khot sin u Shwa, uba dei na ka shnong Lumshnong; u Bah Bobby Marweiñ, uba sah ha Islapunjee, Bangladesh; bad u Bah Saiñkupar Nongtraw u Publicity Secretary bad u ba sah ha Nunchera, Bangladesh.
Kum ban shu pynkynmaw hangne, ha ka jingpynbthei bom IED jong ka HNLC na ka daw ka jingpyneh jong ki bor pynïaid ka Star Cement, Lumshnong ban siew ïa ka pisa ba la dawa da ka HNLC, arngut ki nongtrei ka Star Cement ki la mynsaw.
Ha ka jingïakren bad ki lad pathai khubor u Myntri Rangbah u la ong, “ka jingtohkit jong ka NIA kaba long ka kynhun tohkit ba laitluid kan ym ktah ïa ka jingïakren bad ka HNLC.”
“Ngan ai ka jingkular ba kan ym don kano kano ka jingtuklar lane kan mih kano kano ka jingeh namarba kine ki jingtohkit ba la leh da ki Kynhun ba laitluid kin ym ktah satia ïa ka jingïakren ïasuk,” la bynrap u Conrad.
Haba pynpaw ba kane ka jingïakren ïasuk bad ka HNLC ka dei kaba la tip da ka Sorkar India, u la ong ruh ba ka Ministry of Home Affairs (MHA) ka tip ïa ka jingkyllaiñ jong kane ka kam.
“Namarkata, kano kano ka jingïasyllok donkam ban ïakren bad ka MHA bad nga kular sha baroh ba kan ym don kano kano ka jingeh lane ka jingpynthud ïa ka jingïakren ïasuk,” la ïai ban u Myntri Rangbah.
U Sangma u la kyntait ruh ban ïathuh ïa ki mat ïakren ha ka jingïakren ïasuk bad u la pynkynmaw ruh ba ka HNLC ka la wan shakhmat ban ïakren khlem da buh kyndon.
Shuh shuh u la ïathuh ruh ba u la pyntip ha u Myntri ka tnat Kam Pohing u Amit Shah halor ka jingsdang ka jingïakren ïasuk bad ka HNLC ka jingleit iuhkjat jong u dang shen sha New Delhi.
U la ong ruh ba ka Sorkar kan pynthikna ba kane ka jingïakren ïasuk kan long kaba seisoh khnang ban wanrah biang ïa ka shongsuk shongsaiñ ha ka Jylla.
U la ïathuh ruh ba u Amit Shah u la ai katto katne ki jingai jingmut kumno ban pyntyllun shakhmat ïa ka jingïakren ïasuk bad ka seng HNLC.