Ka jingïakhun da ka wait bad u sum ka la kut, donkam da ka bor jabieng : Bah Hamlet

Shillong, Nohprah 18 : U Myntri ka tnad C&RD ka sorkar jylla, Bah Hamlet Dohling ha ka sngi Saitjaiñ u la ong ba mynta kam dei shuh ka juk ban sei da ka wait bad u sum ban ïakhun pyrshah ïa ki bor ba nabar hynrei ka la dei ka ïa ban ïakhun noh da u khulom bad da ka bor jabieng.
Haba kren ïa kane ha ka jingïalang pynkup burom ïa ki 129 ngut ki samla pule jong ka Mylliem constituency kiba pass bha ha ki eksam bapher bapher ba la tip kum ka U Tirot Sing Syiem Academic Award, u Bah Hamlet ba dei ruh u MLA ka thaiñ u la ong, “U Tirot Sing u ïakhun pyrshah ïa ki dohlieh da ka wait bad u sum hynrei nga pat nga kyntu ïaphi ba ka jingïakhun mynta ïa ki jingeh kiba bun kam dei shuh da ka wait bad u sum hynrei da ka jabieng bad da u khulom. Namar khatduh hi ka wait bad u sum kim lah ban weng ïa ki jingeh hynrei haba ïakhun da ka jabieng ka don ka lynti.”
Utei u nongmihkhmat u pynpaw ruh ïa ka jingbynñiaw ba kum u Myntri Sorkar uba don man ka sngi ha Secretariat u ïohi ba la duna haduh katta katta ki samla Khasi ba kin don kum ki ophisar IAS ne IFS.
“Ngi donkam ïa ki ophisar kiba nabar ruh ban ïarap lang tangba ngi kwah pat ba ki samla Khasi ruh kin don lang ban ïarap ïa ka sorkar jylla kum ki ophisar IAS bad IFS,” u la bynrap biang. Shuh shuh u ong ba da ka jingnang bun ki samla ba pass bha ha ki kyrdan ba shajrong ka ai jingkyrmen ba shen kin sa mih bun ki samla kiban shimti ïa kitei ki kam kum ki ophisar heh.
Kum u MLA u pynpaw ruh ïa ka jingkmen ban ïohi ba mynta u snem ki don haduh arngut ki samla ba wan ha ka Top 20 ha ka SSLC ba kynthup ïa u samla Eleazer Kharmawlong ba wan ha ka 6th position bad u samla Givenstar Nongkhlaw ba ïoh ha ka 15th position. Kine kiba wan ha ka top 20 ki ïoh ruh da ka khsuam kaba kham kyrpang kaba long da ka laptop.
Ki 129 ngut kiwei pat kiba shah pynkup burom ha kane ka sngi ki kynthup ïa ki 81 ngut kiba pass bha ha ka SSLC bad 48 ngut pat ha ka HSSLC. Ha katei ka jingïalang pynkup burom ba la pynlong da ka National People’s Youth Front Mylliem ryngkat bad ka MPYO ka la don ruh ka jingpynkup burom ïa ki 6 ngut ki nongïalehkai ba kynthup ïa ki nongïalehkai Armwrestling kumjuh ïa kiba jop ha ki lympung ïalehkai Jiu-Jitsu, MMA bad ruh ha ka boxing.
La donlang ruh ha kane ka sngi naduh ka Prof. Dr. Badaplin War kaba la ai ka jingkren kaba sngewtynnad bha kyrpang na ka bynta ki samla, nangta u Fr. Tobias Kharngapkynta, ki nongïalam ka NPYF, ki Rangbah Shnong, ki samla pule, ki kmie ki kpa bad ruh ki nongshong shnong.