Ka jingïakhih ki nonghikai, ki nongtrei bad ki samla pule NEHU ka dei kaba shongnia: Dr. Ricky

Shillong, Naiwieng 08: Hadien ba la mih ki kynrum kynram hapoh ka skulbah NEHU haba ïadei bad ki jingpyneh jong u Vice Chancellor u Prof Prabha Shankar Shukla ban pdiang ïa ki mat jingdawa jong ki samla pule, ki nonghikai bad ki nongtrei na ka liang u MP ka VPP na Shillong Parliamentary Constituency u Dr. Ricky A J Syngkon u la ïathuh ba ha ka sngi Palei u la dep leit sha Delhi da ka jingthmu ban ïakynduh ïa u Dharmendra Pradhan u Myntri uba khmih ïa ka tnat pule puthi ka sorkar pdeng halor kane ka jingjia hapoh NEHU.
Haba ïadei bad kane haba ïakren bad ki lad pathai khubor hadien ba la wai ka prokram pynkup burom jong ka Seng Samla Wahingdoh u MP u la ong, “Namar ha ka sngi Palei nga khlem ïoh lad ban ïakynduh ïa u Myntri namarba u bun kam ha ki kam ïalap elekshon kumta ha ka sngi Thohdieng nga la phah noh da ka shithi sha u ban pynpaw ïa ka jingsngewkhia halor ki jinglong jingman hapoh ka skulbah NEHU.”
Halor ka jingïakhih jong ki samla pule ha NEHU u Dr. Ricky u la ong, “Ngan kren kum na ka liang ka party bad kumjuh ruh kum u nonghikai ngi don ki jingdawa jong ki nonghikai bad ym tang ki samla pule hynrei wat kito ruh ki bym dei ki nonghikai bad ki jingdawa ruh ki long kiba shongnia bad ka jingthrang jingangnud jong baroh kiba don hapoh ka skulbah ka long kumno ban tei bad ban pynbha ïa ka skulbah bad ban leh ïa kata ki don ki jingduna hangne hangtai bad kum kiba don hapoh kane ka jaka pule ngi kwah ban pynbeit ïa kine ki jingduna bad haba don kano kano ka jingdkoh ngin hap ban pynbha ym dei tang manga hynrei baroh hi ngi don bynta ban kyrshan ïa kane ka jingïakhih.”
Halor ka jingïakhih ki samla pule kiba la khang tala ruh ïa ka khyrdop jong ka skulbah kaba lah ban ktah ïa ka pule puthi na ka liang u MP u la ong, “Ka shlem jong ka jingpule kan dei ban don kata ka shlem ha kaba ka sawdong sawkun ka ban long ka jingmyntoi ïa ki khynnah pule hynrei kam dei ban don kiwei pat ki jingpynthut la ka long hangne ha NEHU ne hangno hangno ruh kano kano ka jingïakhih khamtam ha kaba ki samla pule kin hap ban mih shabar na ki kamra klas ka long kaei kaei ka bym sngewtynnad naba kane ka ktah ïa ka pule puthi bad kaba ktah ruh ïa ka lawei ka jong ki, kumta nga kyrmen skhem ba kane ka jingïakhih kan poi noh sha kaba kut noh shen.”
Halor ka jingpyneh jong u VC ban sngap ïa ki jingdawa jong ki samla pule, ki nongtrei bad ki nonghikai na ka liang u MP u la ong ba ïa kane ka jubab kan bha hi ba u VC un ai ïa ka jubab kaba biang.