Shillong : Kumba baroh ngi tip, ki khyndiat snem ba nyngkong jong ka jingim ki khunlung kadei kaba kordor bha ban pynwandur ïa ka lawei jong ki. Ka jingkoit jingkhiah jong ki khun jongngi ka dei ka bynta ba kongsan tam ha kaba ka lawei jong ka jylla bad ka ri ka don. Dei ha kum kane ka por, ki don ruh ha ka jingma kaba khraw ban ïoh ïa ki jingpang bapher bapher hynrei kiba lah pat ban sumar.
Dei lyngba kane, ba ka jingai tika ka trei ïa ka bynta kaba kongsan bha – ban ïada ïa ki khun jongngi na ki jingpang ba shyrkhei bha bad ban pyntikna ba kin don barabor ha ka jingkoit jingkhiah kaba pura.
Ha ka jingpyrshang jongngi ban ai jingïada ïa ki khunlung, ka dawai tika ka la trei ïa ka bynta kaba kongsan tam ha kane ka prokram ai tika jongngi. Kane ka dawai Pentavalent ka kynthup ïa ka jingai jingïada ïa ki san tylli ki jingpang ba shyrkhei, kata ka Diphtheria, Pertussis (jyrhoh ksew), Tetanus, Hepatitis B, bad Haemophilus influenzae type b (Hib).
Kine ki jingpang ki lah ruh ban wallam bun jait ki jingpang kum ka jingthut ha ka bor jabieng, ka pang ïap shilliang bad wat ban duhei ïa la ka jingim. Kane ka dawai Pentavalent ka long kaba kongsan ban ïada ïa kine ki jingpang bad don ruhka bynta kaba kongsan wat ban pynduna ïa ka jingïap ki khunlung ba dang kha bad ïa ka koit ka khiah jongki nongshong shnong ha ka jylla.
Kumno ban ïoh ïa ka dawai Pentavalent – Ïa kane ka dawai Pentavalent lah ban ïoh na baroh ki jaka ai jingsumar jong ka sorkar khlem da donkam siew bad na ki hospital shimet. La pynshlur ïa ki kmie ki kpa bad ki nongri ba kin leit sha ki jaka ai jingsumar kiba jan tam ban leit buh kyrteng lypa na bynta ka tika ïa ki khun jong ki da kaba rah lang bad ka MCP Card.
Ïa kane ka dawa la ai kum shi bynta jong ka jingai tika kaba ju leh man ka por. Kumta ka long kaba donkam ban pyndep pura ïa kane ka jingai tika khnang ban ïoh pura ka jingïada.
Ïa ka tika ha ka kylla ba nyngkong lane first dose la ju ai ïa kiba dang 6 taiew ka rta, bud sa ar tylli ki jingai tika kata ha ka rta kaba 10 taiew bad 14 taiew.
Ki sngi ba la pynkhreh kyrpang : Kan long ha ka 27 bad 28 tarik Nohprah, 2024 ha baroh ki jaka ai jingsumar.
Nalor kine ki tarik, ïa ki dawai lah ban ïoh ha man ki sngi ai tika ba la buh khnang kata man ka sngi Balang jong ka taiew.
Katkum ka kyrwoh na ka tnad ka Koit ka Khiah jong ka sorkar jylla la ong ruh ba donkam ban tip ïa kiei kiba dei ban leh bad ki bym dei ban leh hadien ba la dep ai tika. La pynshai ba bunsien ki khynnah rit ki ju khie shit lane at hi jaka ba injek tangba la ong ba kane ka long tang shipor.
La kyntu ruh ba na bynta ki jingtip kiba kham bniah ki paidbah ki lah ban kylli na ki ANM, ASHA, AWW lane ban leit mih ha ki jaka ai jingsumar kiba jan tam.
