Ka Jinglamphrang
Ha ka juk digital, ka jingïakhun kam sahkut tang ha ki madan thma. Nalor ki kam shipai, ka jingpyndonkam ïa ka jingtip kum ka atiar kaba jur bha ka dang ïaid lyngba ka online. Hadien ka sienjam kaba thikna bad kaba stad jong ki shipai India hapoh ka Operation SINDOOR, ka India ka la shem ba ka la shah ther da ki jingpynbna kiba jur bha kiba ïalam bakla ba la pynlong da ka Pakistan. Ka jingthmu: ban pynkylla ïa ka jingshisha, ban ïalam bakla ïa ki briew ha ka pyrthei, bad ban ïoh biang ïa ka jingshisha hapdeng ki jingai jingtip kiba bakla. Hynrei ka India ka dang shimkhia ban jubab bad pynphriang ïa ki jingtip kiba bakla da ki jingshisha, ka jinglong kaba shai bad ka dang pyni ïa ka jingpeitngor kaba khlaiñ ha ka digital.
Ki jingpynbna jong ka Pakistan
Hadien ka Operation SINDOOR, ka Pakistan ka la jubab ym tang da ki jingkren hynrei da ki jingai jingtip kiba ïalam bakla. Kane ka kynthup ïa:
Ki lad pathai khubor ba la pyndonkam biang: La pyndonkam bakla ïa ki dur bad ki video kiba rim kum ki jingjia ba dang shen, kiba ïadei bad ka thma.
Ki jingkam ba lamler shaphang ki jingjop: La pynphriang ïa ki jingkynnoh lamler shaphang ka jingduhnong ka India, kynthup ïa ki liengsuiñ jet ba la ïoh siat bad ki shipai ba la ïoh kem, khlem kano kano ka nongrim ba shisha. Wat ki lad pathai khubor jong ka Pakistan ruh ki la pynkhraw ïa kine ki jingduhnong lamler ha ki lad pathai khubor.
Ka jingïadon bynta lang jong ka sorkar: Ki heh ophisar jong ka Pakistan, kynthup ïa ki myntri, ki pynphriang ïa ki dur ki video ki bym shym la pynshisha bad ba la pynkylla ha ki social media.
Ka jubab jong ka India: Ka jingshisha, ym ka jingmutdur
Ka India ka la jubab ïa kane ka jingpynïaid ïa ki jingai jingtip da ka buit kaba skhem, kaba pynshong nongrim ha ki sakhi kaba don tynrai ha ka jinglong kaba shai bad ka jingkitkhlieh.
Ka jingpynshisha kaba mardor
Ka India ka la pynshisha mardor ïa ki jingkam ba la saphriang da ki sakhi ba lah ban ïohi bad ka jingwad bniah ïa ki tynrai ryngkat bad ka kynhun ba dei khmih. Kane ka jingtrei wutwut ka la ïarap:
Ban pynshai ïa ka tynrai jong ki video kiba ïalam bakla. Pynthikna ïa ki tarik ba shisha bad ka jinglong jong ki dur ba la pyndonkam biang. Pyni ïa ka jingshisha ha kaba ïadei bad ki jingkam ba ïalam bakla da kaba pyni da ki sakhi. Ka video ka la saphriang da kaba kynnoh ba ki shipai liengsuiñ jong ka Pakistan ki la thew ïa ka kad liengsuiñ jong ka Srinagar. Ha ka jingshisha, ïa kane ka dur la lap na ki jingïakynat hapdeng ki kynhun niam ha Khyber Pakhtunkhwa, Pakistan, kiba la jia ha kaba sdang jong u snem 2024. Kane ka video kam don jingïadei bad ka Kashmir ne kano kano ka jingthombor liengsuiñ kaba dang shen.
Kawei pat ka khubor hamsaïa ka la kynnoh ba ka Pakistan ka la pynjot ïa kawei ka Headquarter jong ka Indian Brigade, ka jingkynnoh ka bym don nongrim satia ha ka jingshisha bad ka dei kaba la shu thaw hi baroh kawei, ong ki tyllong khubor na ka tnad ïada ri.
Nalor kata, sa kawei pat ka dur kaba rim -ka jinghap ka MiG-29 ha Barmer, Rajasthan, naduh u bnai Nailur 2024 – la pynphriang biang da ki social media kiba kyrshan ïa ka Pakistan ban pynpaw ïa ki jingduh ïa ki shipai pynher liensuiñ jong ka India dang shen, ki bym shym la jia-
Kum kine ki buit ki dei shi bynta jong ka jingtreikam kaba kham jylliew ha ka jingmut jingpyrkhat kaba thmu ban pynmih ka jingkulmar, ban pynduh mynsiem ïa ki paidbah, bad ban pynwandur ïa ka jingmut jingpyrkhat jong ka pyrthei sha ka liang jong ka Pakistan.
Ki jingïakren ba kongsan.
Ka tnat ïada jong ka ri India lyngba ki jingïakren bad ki nongthoh khubor bad ki account digital ba la pynshisha, ka la pynneh ïa ka jingïaid kaba beit jong ki jingpynbna ba thikna ban kiar na ki jinglong thylli jong ka jingïoh jingtip kiba lah ban shah pyndonkam bakla. Haduh mynta, la pynlong 2 tylli ki jingïalang bad ki lad pathai khubor ban pyntip sha ki paidbah shaphang ka Operation SINDOOR bad ki jingpynbna ba ïadei bad kane.
Ka jingpeitngor digital bad ka jingpynsngewthuh paidbah.
Ki briew jong ka India ki la pyni ïa ka jingsngewthuh bad jingsngew artatien kaba nang kiew shaphang ki dur bad ki video kiba la saphriang. Kito kiba don bynta ha ki kam digital jong ka ri India bad ki nongpeit bniah ha ka liang ka kam ïada ri ki la don bynta ha kaba pynkhraw ïa ki jingpeit bniah ïa ki jingshisha bad ban pynpaw pyrthei ïa ki jingpyrshang ba ïatreilang ban pynsngewthuh bakla.
Ka jingpynpaw ïa ka jingtlot kaba don ha lyndet jong ka jingpynkulmar jingmut.
Ka rukom treikam jong ka India pyrshah ïa kane kam sahkut ha tang ka jingpynrem, ka pynpaw ruh ïa ki jingduna ha ki jingdon jingem jong ki shipai jong ka Pakistan ba la pyrshang ban buhrieh lyngba kane ka jingpynsaphriang ïa ki khubor thok.
Kane ka kam ka pynpaw kumno ka tnat shipai jong ka Pakistan, kaba ju pyni kum ka bor kaba shyrkhei, ka treikam kham palat kum u nongthied ïa ki tiar ïaleh bar ri ban ïa ka rukom ïaleh thma kaba ïatylli. Ha ka por jong ka Operation SINDOOR:
Ki battery HQ-9 ba la shna da ka China kim shym la lah ban lap ne khanglad ïa ki namding SCALP jong ka India, kiba la dei ïa ki thong ha Bahawalpur bad Muridke.
Ki jaka ai jingbthah bad jingpynïaid kim shym la pyni ïa kano kano ka bor ïaleh pyrshah ha ka madan thma ha baroh kawei ka jingtreikam kaba 25 minit.
Ki namding PL-15 air-to-air kiba la siat bakla pyrshah ïa ki Su-30MKI jong ka India, kaba pynpaw ïa ka jingbym lah ban pynïasoh ïa ki kor ba la wanrah nabar ri bad ki jingdon jingem ba la don lypa jong ka Pakistan.
Ha ka jaka jong ka jinglong nongïalam kaba sted ban shim ïa ka rai, ki heh shipai Pakistan ki shu leh pyrshah da kaba ai ki jingpynbna, ki leh kum ki nongpynïaid ophis kiba peit ïa ki kot jingthoh ym kum ki nongïalam kiba pynïaid ïa ki kam.
Kane ka jingpynpaw ïa ka jingbym lah ban leh eiei bad ka jingtlot ha ka liang ka teknoloji ka ïapher bak-ly-bak na ki jingbatai ba ka Pakistan ka la pyrshang ban pynïaid online. Kumta ka jingïakhih kam pyrshah tang ïa ki jingtip ba bakla hynrei ka pynkylla dur biang ïa ka jingshaniah palat jong ka Pakistan ha ki mar kiba khlem pat shah tynjuh bad ki buit kiba la rim ha ka rukom leh thma mynta.
Ka jingpyni ïa ka jingshisha lyngba ka jingshaniah.
Ha ka jaka ban leh pyrshah da ka jingsngew, ka India ka la shim ïa ka rukom kaba ryntih bad kaba don ka rukom treikam ha ka thma jingtip:
Ka jingpynpaw ïa ka jingseisoh ka kam: La pyni ïa ka jingseisoh jong ka Operation SINDOOR da kaba shai, da kaba pynleit jingmut ha ki jingmih ba kongsan ban ïa ka jingpynbyrngia.
Ka jingpynjah burom ïa ki tyllong jingpynbna: Ki bor ba dei khmih jong ka India ki la pynpaw pyrthei ïa ki buit thok ba la pyndonkam da ki account ba don ha Pakistan, kiba bun na kine mynta ki don hapoh ka jingpeit bniah jong ki lad pathai khubor jong ka pyrthei.
Ka jingkyntiew ïa ka jingsngewthuh ïa ki khubor: Ki jingïalap ban hikai ïa ki nongshong shnong kumno ban ithuh ïa ki khubor lamler ki la ïarap ban wanrah ïa ka jinglong kaba kham khlaiñ ha ki kam digital.
Ka jingpynkut: Ka Jingshisha kum ka atiar kaba kongsan.
Ka thma jong ka India pyrshah ïa ki jingpynbna thok ka dei ka dak ia ka jinglong rangbah jong ka ri ha kaba pynïaid ïa ka thma hybrid. Da kaba ïakhun pyrshah ïa ki jingtip kiba bakla da ki jingshisha bad ban don nongrim ha ka jingai jingtip kaba thikna, ka India kam shym la ïada tang ïa ka bor synshar ri jong ka hynrei ka la pynskhem ruh ïa ka jinglong ba janai jong ki jingtip. Ha ka juk ha kaba ka jingsngewthuh ka lah ban thaw dur ïa ka polisi bad ka jingtieng ka lah ban saphriang da ka jingthoh tweet, ka jinglah jong ka India ban pynpaw bad pynduh ïa ki jingtip kiba bakla ka long kaba kongsan kumjuh kum ka jinglah jong ka ban jop ha madan thma.