Nongstoiñ, Jylliew, 15: Ka Nongjyllieh Youth Sport Social & Development Organisation (NYSSDO), ka la pynkut ïa ka final jong ka Pyrem Inter Dong Football Tournament 2025 ha ka sngi saitjaiñ ha Madan Phudumtong Nongjyllieh hapdeng ka Dong Mawsiang FC na shnong Nongjyllieh pyrshang ïa ka Tynrongwahlulong SC na shnong Sohlait West Khasi Hills.
Ha katei ka jingïakhun ka Dong Mawsiang FC ka la jop da 3-1 ïa ka Tynrongwahlulong SC. La ïoh ban sam ruh ïa ki khusnam ha katei ka tournament ïa ka nam nongthep goal ba kynsai tam la ïoh da u Shanlistar Nongdkhar, u nongap goal ba kynsai da u Pynskhem Nongsiej bad u nongïalehkai ba kynsai tam lah rah da u Eddieson Nongsiej.
Ha katei ka jingpynkut ïa katei ka final, u bah Jistarlan Lyngkhoi Assistant Secretary FKJGP West Khasi Hills u la long u kongsan. Haba ai jingkren u la kyntu jur ïa ki samla ban kin kyiar na ki jingmlien ba sniew kum ka kyiad, u drok bad kiwei ki jingdih ba pynbuaid kiba la pynjot ïa bun bah ki rang ïalehkai. U la ong ka jinghiar dor ha ka jinglong ka met ka phad, ka pynhiar dor ïa ka jinglong ka mynsiem.
U la kyntu jur ïa ki samla ba ka kam ïalehkai football mynta kam dei shuh ka kam ïalehkai byrngia, hynrei ka lad jingmyntoi kaba khraw kumta kim dei ban kheiñ sting. Ha ka sngi pynkut la ïadon lang ki riew rangbah jong ka shnong bad ki nongïalam jong katei ka club.
