Ka jingduh bor ding khah khah ha ka thaiñ Narpuh ka buh jingeh ïa ki paidbah : KSU-NC

Khliehriat, Naitung 17: Ka Khasi Students Union Narpuh Circle, ka pynpaw ka jingsngew khia halor ka jingkynduh jingeh ki paidbah ha ka thaiñ Narpuh East Jaiñtia Hills District namar ka jingduh bor ding ha ka thaiñ ka ju jia khah khah bad ong ruh ba ka jingioh bor ding ki paidbah kam sngew ïahap shuh bad ka jingsiew bai bor ding ba ki ju siew man la u bnai.
Ki shnong ha ka elaka Narpuh kiba duh bor ding khah khah ki kynthup ka shnong Sonapyrdi, Tongseng, Lum Tongseng, Umsataiñ, Lummyrli, Kuliang bad kiwei kiwei ki shnong.Na ka liang ka seng ka kynthoh ruh ba “Ka jingduh bor ding ka thaiñ ka kham palat pynban ïa ka loadsheding, kumta ka jingkam u myntri rangbah ba kan nym don loadsheding shuh kam ïahap satia bad ka jingioh bor ding”
Na ka liang ka seng, lyngba u kyrwoh na u Vice President KSU Narpuh Circle, u bah Phanuel Tongper, ka kyntu jur ïa ka tnat bor ding ba kan shim khia ban pynbit pynbiang ïa ka bor ding ha ka thaiñ, namar kane ka jingduh bor ding ka ktah ïa ki longiïng kiba pyndonkam ïa ka bor ding bad kumjuh ruh ka ktah ïa ki khynnah pule kiba khreh kot, kumjuh ruh ka ktah ïa ki ophis treikam bapher bapher kiba don ha ka thaiñ.