Shillong, Naiwieng 01: Ka John Calvin Presbyterian Lower Primary School Langkyrding Mihngi ha ka sngi Thohdieng ka la pynlong ïa ka Food Fest Cum Sale of Works 2024 kaba dei ka jingthmu ban pynmih pisa na ka bynta kiba bun ki jingdonkam jong ka skul. Ha kane ka sngi la wan ban plie ïa kane ka tamasa ïadie jingbam da u CEM ka KHADC u Bah Pynïaid Sing Syiem uba la long u kongsan ha ka jingdonlang u MDC ka thaiñ u Bah P N Syiem kum u Symbud Kongsan ha ka jingdonlang ki Pastor, ki Tymmen basan, ki khynnah skul, ki kmie ki kpa, ki nonghikai bad kiwei kiwei kiba la shah khot sngewbha.
Ha shwa ban plie ïa kane ka tamasa ne ka ïew ïadie jingbam na ka liang u CEM u la ong ba na ka liang ka KHADC ka don ka jingïatreilang kaba jan bad u local MDC ban khmih ïa ka eh ka shon ka jaitbynriew, ki jingdonkam ha ki skul, kiwei ki kam pynroi.
“Ka jingthmu kane ka skul ka long ban ai ka jingshakri ïa kane ka dong ka thaiñ. Kane ka skul ka la pynmih ïa ki heb kiba rit kiba don sap bapher bapher. Nga sngewkmen ban tip ba phi pynlong ïa kane ka prokram bad nga la pdiang sngewbha ïa kane ka jingkhot sngewbha bad namar ka jingthmu jong ka Balang ban wanrah ki jingmyntoi ïa ki nongshong shnong bad ki briew ka jylla,” ong u CEM.
U la ong ba ka jylla Meghalaya ka la kiew mynta ha ka pule puthi bad ka jingkylla dur ka jylla kadei namar ka jingwan jong ki Balang Khristan, la ka dei ha ka koit ka khiah. “Ki kam Mission jong ka Balang Presbyterian ki la long ruh ki dak ki shin kiba la wanrah ka jingkylla dur ïa kane ka jylla jong ngi,” ong u CEM. Ha kaba ïadei pat ka dorkhas ba la aiti da ka skul halor kiba bun ki jingdonkam jong ka skul, na ka liang ka KHADC kan pyrshang katba lah ban pynnoh da ka jingïatreilang bad u MDC bad ban pyrshang ban ai ïa ka skhim bad lada ym lah ban ai hapoh ka samoi treikam yn pyrshang ban pynrung hapoh ka skim lyngba ka 15 finance kaba dei na ka tied bad untied grant.
Katba na ka liang u Bah P N Syiem kum u MDC ka thaiñ u la ong ba ïa kane ka skul la seng ban saiñdur ïa ki heb kiba rit wat hapdeng ki jingeh ba ki la ïaksaid katba lah ban pynheh pynsan ïa kane ka skul naba kum kane ka prokram kan ïarap ban pynmih pisa na ka bynta ki kam jingtei bad ki jingdonkam jong ka skul. “Kumta kum u MDC nga kyrpad ïa u CEM ban ïarap lem na ka bynta ki jingdonkam jong kane ka skul kum ka kamra Library, ka paiñkhana kaba biang, ban ïarap lem na ka bynta ka jingker kynroh nalor kiwei pat ki jingdonkam.
“Watla nga la ai ki jingïarap na ka KHADC kum u MDC ha ki por ba la leit, ngan pyrshang ruh katba lah ha kine ki bnai kiba dangsah kum u MDC ha shwa ban leit noh sha ka elekshon ha u snem ban wan,” ong u Bah P N Syiem.
Ha kane ka sngi la pule ruh ïa ka dorkhas da iwei na i nonghikai ka skul iba la ong ba ha kine ki 3 snem ka skul ka donkam ban don ïa ka Library, ka paiñkhana nalor ka jingdonkam ka jingker kynroh ïa ka skul ha ka jinglut kaba la mang kumba T. 10 lak.
La pynïaid ïa ka jingïalang da u Rev P Mawlong, President ka Managing Committee, ka jingpule ïa ka ktien U Blei bad jingduwai na u T.Bn, W Wanswett, ki jingshad na ki khynnah skul, ka jingai khublei na u T.Bn L S Nongseij nalor kiwei kiwei pat ki prokram.
