Ka jingdon jong ki Dorbar Hall ka jingmyntoi jong kiba bun ki paidbah: Renikton

Mawkyrwat, Nohprah 05: U bah Renikton Lyngdoh Tongkhar, MLA ka Mawkyrwat Constituency bad kum u Myntri jong ka sorkar Meghalaya ha ka tnad Umbam Umdih u la ïoh ban plie paidbah ïa ka Sohkhyllam Resource Centers (SRC) kaba don ha shnong Sohkhyllam, South West Khasi Hills District kaba ha ka jingmang pisa kaba T. 40 lak tyngka bad da ka jingdon jong kane ka CRC kan long ka jingmyntoi bad jingkyrkhu ïa kiba bun.
Lah ban kdew ba ïa kane ka Resource Centre la pyntrei da ka jingïasnohktilang jong ki ar tylli ki skhim kata na ka skhim 100 sngi ne MGNREGA bad na ka Rurban Mission kaba dei hapoh jong ka Mawlangwir Cluster ha ka jingmang pisa kaba T. 40/- lak tyngka bad ba la peit ruh da ki ar tylli ki ophis treikam kata napoh ka ophis u Block Development Office, Mawkyrwat C&RD Block bad na ka ophis jong u District Rural Development Agency (DRDA), South West Khasi Hills District.
U bah Renikton Lyngdoh Tongkhar, MLA ka Mawkyrwat Constituency bad kum u Myntri jong ka sorkar Meghalaya ha ka tnad Umbam Umdih haba kren ha ka jingïalang u la ong ba ka long ka jingkmen ban ïoh ban ïa don bynta lang ha kane ka sngi ka ban long ruh ka sngi jong ka jingsah jingkynmaw ban ïoh ban plie paidbah ïa ka Community Resource Centre kaba long kawei na ki jaka ha kaba ki paidbah nongshong shnong kin ïoh ban pyndonkam ha kiba bun ki bynta. U la ai ruh ka jingïaroh na ka bynta ki ophisar sorkar kiba la trei shitom ban pynurlong ïa kane ka jingtei, hooid! haba pyrkhat ka long ka jingmang kaba la biang pura hynrei lyngba ymdon ka jingïatreilang jong ki paidbah nongshong shnong kan nym long ka jingtei kaba itynnad bad kaba ki nongtrei kin ïoh ban pyndonkam hok ïa ka bhah ba la mang da ka Sorkar.
Namarkata, u la ai ka jingïaroh shikatdei eh ïa ka jinglakloi jong ki paidbah nongshong shnong ban long kiba ïatreilang ha baroh ki liang bad la long ruh kana donkam ba kin ïai long kiba ïatreilang ha ki por baroh khamtam eh ban wanrah ïa ki jingkylla kiba bun hapoh ki shnong ki thaw, ha ri bad ka jaidbynriew baroh kawei.
Haba kren halor ka jingïoh ban pyntreikam bad pynwan dur ïa shibun ki kam pynroi, u la ong ba ka South West Khasi Hills District ka dei kawei na ki saw tylli ki distrik hapoh jong ka jylla Meghalaya kaba la shah jied ban don hapoh jong ka jingpyntreikam ïa ki kam pynroi lyngba ka Rurban Mission ha kaba ka Mawlangwir Cluster ka dei kawei na ki cluster kaba la paw bad kaba ka la long ka jingkyrkhu kaba khraw na ka bynta ki shnong ki thaw kiba la ïoh ban pyntreikam, ong u bah Renik. Ha kajuh ka por ula ai ruh ka jingkhublei ba lyngba ka jingtreilang bad ka skhim 100 sngi ka la long ka jingmyntoi shibun eh ban pyntyllun ïa ki kam.
Shuh shuh u la ong ruh ba ka jingdon jong kine ki Community Resource Centre ne ki Dorbar Hall ha manla ki shnong kan long ka jingmyntoi ïa ki paidbah jong ka shnong la ka long ha ka ban pynlong ïa ki dorbar shnong bad kiwei de ki kam bad ymtang kata hynrei wat ki longïing kiba bym ïoh bym kot ban shna ki dara ha heh ha kaba por ba ki donkam kum ki jingïathoh kin lah ban pyndonkam ïa kane ka hall ha kaba khreh ki kynja jingkhawai. “Da ka jingdon jong kane ka CRC kan long ruh ka jingïarap ïa ka shnong ban pynmih pisa ruh lyngba ka jingpyndonkam jong ki briew ïa kane ka ïing, la ka long ki briew kiba napoh shnong ne wat kiba nabar ruh”, u la ong. Kumta u don ka jingkyrmen ba lyngba ka jingpynïaid jong kawei na ki komiti ïa kaba ka shnong ka la aiti, kan sa lah ban pynïaid beit ha ka rukom kaba dei.
U bah Renik u la ong ruh ba ka jingplie ïa kane ka CRC ka la long ha ka por kaba biang eh ba kum ki nongpynïaid kin sa ïoh ban sdang ïa ki jingkamai, namar ka elekshon ka la jan bad ki nongwan ïalap elekshon ruh kin hap ban pyndonkam ïa kane ka ïing ym shuh ha kiwei de ki jaka. Kumta u la ai jingmut ba ïa kiwei ki kam kiba long manla ka por ïaleh ban shim tang khyndiat hynrei ïa ki political party pat shim ha ka dor kaba rem namar ma ki ki wan pynlong jingïalang tang shi sien ha ka san snem.
Ha kane ka sngi la ïadonlang ruh naduh u bah I. Lawrynñiang, MCS, Block Development Office, Mawkyrwat C&RD Block, u la ong ba da ka jingdon jong kane ka Community Resources Centres kam dei eh tang ban pynlong kino kino ki kynja jingïalang jong ka Shnong ne jong kiwei pat hynrei kin don ruh ha ka ïa ki jaka sah miet (Guest House), ki jaka bam kiba paka, ki jaka leit shabar kiba khuid kumba long hapoh ka Community Resources Centres hapoh Mawranglang Lai Kyntoit.
Kumta u la ai mynsiem ïa kawei na ki kynhun ka ban sa long ka nongpynïaid ïa kane ka Community Resources Centres ba kan pynïaid bha ha ka rukom kaba dei khnang ba ki jingthmu baroh kin urlong bad khnang ba ka Shnong ka thaw kan nang kiew ha ki liang baroh.
Kiwei pat kiba ïa don lang ki long u bah Kynsailin Snaitang, District Programme Manager jong ka ophis DRDA, South West Khasi Hills District, u bah Tennyson Kharmujai, Junior Engineer hapoh ka ophis u BDO, Mawkyrwat C&RD Block, ka kong Rila Kharlyngdoh, Block Project Manager jong ka NRLM bad kiwei de.
Ïa ka jingïalang ha kane ka sngi la pynïaid da u Myntri Shnong Sohkhyllam, u bah P. Wanniang, ka jingkren pdiang na ka kong Shidalin Marngar, Secretary jong ka VO, ka jingrwai pdiang na dkhot ka VO, ka jingshad tynrai na ka Seng Samla Shnong Sohkhyllam bad ka jingkren khublei na u bah S. Wanniang, Chairman ka VEC Sohkhyllam.