Ki briew kiba don ïa ka jingpang Alzheimer’s disease kaba dang shu sdang, kiba dih kiad khyndiat eh lane tang malu mala man la ka sngi ka don jingiaiadai ka jingdsuna kane ka jingpang. “Kine ki jingshem lehse ki long kiba pynlyngngoh namar ka jingpang Alzheimer’s disease ka dei kata ka jingshitom neuro-degenerative disease bad ngi tip ba ka kyiad ka lah ban don ïa ki bor treikam kiba buh jingma na ka bynta ka jabieng” ong u Dr Sine Berntsen ka University of Copenhagen ha Denmark. Ha ki jingpule bniah ba mynshuwa ba ka jingdih kiad tang khyndiat ba malu mala ka lah ban don ïa kata ka bor treikam ba ai jingïada na ka bynta ka jingpang cardiovascular disease”, u la bynrap.”Ki stad pule bniah ki la pyndonkam ïa ka jinglum jingkheiñ na ka jingpule bniah ba mynshuwa ba la saiñdur na ka bynta ban shim jingkheiñ halor ka jingïasyllok psychosocial counseling ba 12 bnai bad bad ki support programme na ka bynta ki briew ba don ïa ka jingsdang ka jingpang Alzheimer’s disease. Ka jingpule bniah ka la buddien ïa 321 ngut ki nongïashim bynta ha Denmark ha ka programe ba shi snem, ha kaba ki nongthoh ki la lumlang ïa ki jingshim jingkhein na ki nongsumar jong ki nongpang shaphang ka rukom im ka jong ki, haduh katno uwei uwei u nongpang u ju mlien ban dih ha ka shi sngi.”Duna ïa ka 10 percent na ki briew kim dih kyiad, katba kumba 70 percent ki dih kumba shi unit ka kyiad ha ka shi sngi. Ka shi unit ka kyiad ka ïa ryngkat bad 10 millitre ka kyiad bym pat khleh um, shi bynta na ka lai bynta jong ka shi pint ka beer lane shiteng klad ka wine. Kumba 17 percent na ki nongïashim bynta ki la dih ar haduh lai unit ha ka shi sngi, katba duna ïa ka 5 percent ki dih palat ïa ka lai unit ha ka shi sngi. Ha ka jingpule bniah ba saw snem, 53 ngut na ki 321 ngut ki nongïashim bynta ki la khlad.
“Ki briew ïa kiba la lap ba don ia ka jingshitom Alzheimer’s disease haba kheiñ kyllum ki don ïa ka lad ban im phra haduh shiphew snem, la ong u Berntsen. Kito kiba dih ar haduh lai unit ha ka shi sngi ki don ka jingma ba duna da 77 percent na ka jingïap ban ïa kito kiba dih tang shi unit lane duna ha ka shi sngi hadien ba la shim jingkheiñ ïa ka rta, ka jingnang jingstad, jinglong kynthei ne shynrang bad ka jingdih duma, la ïathuh ki stad pule bniah ha ka BMJ Open. “Ngim lah ban ong da kaba thikna kaei ka daw ba don sha lyndet jong kane”, la ïathuh u Berntsen ha ka Reuters Health.” Ki jingpule bniah ba mynshuwa halor ka kyiad bad ka jingïap ha ki bynta ba ïadei bad ka koit ka khiah ki la ai ïa ki jingbatai bapher bapher halor ka jingpynduna ïa ka jingïap da ka jingdih kiad tang khyndiat bad malu mala kum kata ka jingpynduna ïa ka jingma na ka jingshitom kaba ktah ïa u klongsnam ne cardiovascilar disease, ka jingpynthymmai ïa kita ki jinglong at ne tyrha bad kyntiew ïa ka jingtreikam jong ka insulin”. Ki briew kiba dih kiad malu mala ki lah ban don ïa kata ka jinglong jingman kaba biang ha ka imlang sahlang, kaba da lade hi ka lah ban don ïa ki jingmyntoi”, la ong u Berntsen. Ka jingdih kiad ba malu mala ka don ïa ki bor treikam ba ai jingmyntoi na ka jingpang klongsnam ne cardiovascular disease bad ka cholesterol”, la ong u Dr. Siegfried Weyerer ka Central Institute of Mental Health ha Mannheim, Germany, kaba long bynta ka jingpule bniah kaba thymmai. “Ngam lah ban ïohi ïa kano kano ka daw balei ki nongpang Alzheimer’s disease ba malu mala kiba dih kyiad da ka jingkit khlieh ne da ka jingsngew thuh kim dei ban don ïa ki jingmyntoi ba ïadei bad ka koit ka khiah kynthup ïa kata ka jinglah ban im kham slem”, ong u Weyerer.
