Shilong, Risaw 19: Ka District TB Office, East Garo Hills District, Meghalaya ka la pynlong ïa ka jingai jinghikai haba ïadei bad ka jingpang TB ha ka jingïalang kaba la pynlong ha East bad North Garo Hills na ka bynta ki jaka sumar ba shimet bad ha kane ka sngi la pyllait ruh ïa ki tiar sumar ïa ka jingpang ne ki TB IEC Assets kaba la ai kyrteng da ka “Do You Know? Campaign”. Na ka liang u Dr. Diganta Thakuria, WHO Consultant u la batai bniah halor ka jingpang Tuberculosis, TB kaba dei kawei na ki jingpang kaba pur lyngba ka lyer.
Ha kane ka jingïalang ïalap na ka liang jong u, u la kyrpad ïa ki nongïashim bynta ban pyntip sha ka District Tuberculosis Centre lada don kino kino ki dak ki shin khnang ban ïoh ki lad jingsumar kiba biang. Na ka liang u Bah David F. Rapsang, District Drug Inspector, East Garo Hills District u la kren halor kawei pat ka phang kaba ïadei bad Schedule H1 drug. U la banjur halor ka jingdonkam ban die ïa H1 drug, kaba dei ruh ban long katkum ka jingthoh na ki doktor naba une u dawai u dei uba don ka jingma kaba khraw la sa pyndonkam bakla.
Ka jingïadie ïathied kaba long da ka ktien, bad ki Special Sale register ha ryngkat bad ki cash Memo dei ban buh bha. Ka jingdie khlem ka jingthoh da ki doktor bad khlem ka jingdon jong ki pharmacist ka long kaba la pynkheiñ ïa ka Drugs and Cosmetics Act 1940 and Rules 1945 bad kum kine ki jingpynkheiñ ki lah ban khring ïa ka jingshah daiñ kuna da ki bor ba dei peit, ka Suspension ne wat ka Cancellation jong ka License. U la ong ba 90% jong ki anti-TB drugs kidei ki Schedule H1 drugs bad ka jingpyndonkam bakla ka lah ban ïalam sha ka Drugs Resistance. Naba ka jingpang TB ka dei kaba lah ban lam sha ka jingïap ha ka pyrthei, kumta ka jingdie ïa kine ki dawai anti-TB drugs ka dei kaba la khmih bniah bha.
Kumta kum ban ïaid shakhmat ka donkam ïa ka jingïatreilang ka jingïasngewthuh jingmut ha kaba ïadei bad kane ka jingpang, ïa kiba pang ruh dei ban ïoh ka jingïasyllok khnang ban lah ban pynduh jait ïa kane ka jingpang TB. Ha kane ka prokram na ka liang u Sengchrang Marak, District Program Coordinator, East Garo Hills District u la ai ruh ka jinghikai halor ka Mother App kaba dei ka TB Notifications App jong ka jylla ba la pynmih da ka Office The Mission Director, National Health Mission, Meghalaya. Kane ka app kan ïarap ban pynrung kyrteng ïa kiba pang TB na ki jaka sumar jong ki riew shimet.
La ong ba kane ka dei sngi kaba kyrpang na ka bynta ka ophis District TB naba la lah ban pyllait ïa ka TB IEC asset kaba la khot da ka DO YOU KNOW? Campaign halor ka Private Sector Engagement. Na ka liang Dr. Chrissie Pearly M. Sangma, District TB Officer, East Garo Hills District, Meghalaya la batai lyngkot shaphang kane ka jingïalap khnang ban lah ban wanrah ïa kane jingsumar ïa ka jingpang tuberculosis (TB) kaba long kaba donkam ha ki jaka sumar shimet.
Kane ka jingïalap kan ïarap ruh ïa ki nongsumar shimet ha kaba ïadei bad ka jingpang TB kaba ïaid ruh katkum ki kyndon jong ka NTEP ba la buh ruh da ka sorkar kaba long kum ka jingpynsuk ïa kiba pang TB, kaba ïadei ruh bad ka Ni-Kshayportal.
Na ka liang ka District Medical & Health Officer, East Garo Hills District, ka Dr. Cruzie Elmina N. Sangma ha ka jingkren jong ka, ka la ong ba ka TB programme ka la ïaid bha ha kine ki snem ba la dep bad ka la pynkynmaw ba ka District ka don ka jingthmu ban pynduh jait noh ïa ka jingpang TB. Katba na ka liang u District Commissioner, ka East Garo Hills District, u Vibhor Aggarwal, IAS u la banjur halor ka bynta bad ki kam ba ki nongsumar shimet ban ïatreilang bad ka National Tuberculosis Elimination Program khnang ban lap ïa kane ka jait jingpang.
U la ïaroh ïa ka District TB Office halor ka jinglah jong ki ban pyntreikam ïa kine ki IEC asset kaba dei kawei na ki rynsan ban pynïadei bad ki nongshong shnong. Ka jingtip kaba dei kan long ka jingmyntoi na ka bynta ki nongpang bad kumjuh ruh ïa ki nongshong shnong. U la pynthikna ban kner ki kti ïarap na ka liang ki bor pynïaid district ïa ka District TB Office halor ka jingthmu jong ki ban pynduh jait ïa ka jingpang TB. U la ong ba kane ka IEC Campaign bad Advertisement ka dei ka lynti ban ai jinghikai bad jingpynsngewthuh sha ki paidbah ba bun.
