Ka jingdaiñ kuna 10 hajar da ka tnat Transport ïa ki nongkamai ar shaka ka long shaba palat: P.T Sawkmie

Shillong, Nailur 29 : U Bah P.T Sawkmie, MLA barim, da ka jingsngewkhia u pynpaw ba ka sorkar ka dei ban tuklar ïa ka kuna ne ka fine ba ka transport department ka daiñ ïa ki nongkamai ar shaka (scooty), kaba haduh shiphew hajar tyngka bad kaba la ai por khatsan sngi ban leit siew, lym kumta kin hap leit sha ïingkashari (court).
“Kane ka jingleh donbor ka transport department ka long pynban ban khanglad ïa ki samla jong ngi ba kin trei shitom. Ha jingshisha ka transport department ka la dei ban ïarap ïa ki samla ban pynsngewthuh ïa ki kaei ba kin pynbiang bad ynda la biang sa ïa kit passenger bad ka mai, ym ban shu daiñ kuna pathar,” ong u Bah Sawkmie.
U bynrap, “Kat kane ka pyrthei kyrduh kam kyrduh jam ngi la dei ban kmen ba ki samla jong ngi ki sdang ïa ka kam la jong, ha ka jaka ban ai mynsiem ngi pynduh mynsiem pynban. Wat ki kali shimet ne private, kiba dei ki saw shaka kiba kamai khlem permit ngam ïoh sngew ba kin sha daiñ kuna haduh shi phew hajar tyngka, katno tam ki nongkamai scooty.”