Nongstoiñ, Jylliew, 26: Ka FKJGP ka pynpaw ïa ka jingsngew diaw ïa ka jingbym kynthup lem ïa ka West Khasi Hills District na ka bynta ki madan phlang plastic lane Artificial Turf, watla ka la don ïa ki ar tylli ki madan football kiba la biang ban shna ïa utei u Artificial turf, kita ki long ka Nongpathar Playground ha Pyndengrei bad ka NDSA Playground ha Nongpyndeng.
Kaei kaba paw shai ka dei ka jingbym kheiñ snep jong ka Sorkar ïa ka West Khasi Hill, watla ka la dei ka District kaba la rim tam hapoh ka jylla kaba la ju pynlong ïa ka jingïalehkai kiba heh manla ka snem, ong ki nongïalam, watla kiba bun ki rang bad ki thei ïalehkai kiba ka District ka la sei na ka bynta ban mihkhmat na ka bynta ka jylla. Ka jingkylli ka long balei kiwei ki District ki ïoh haduh art ylli ki Artificial Turf Playground ha ka shisien pynbna. Katba ka West Khasi Hills District pat ka la shah ieh beiñ ha kaba wat tang kawei kim ai.
Dang shen ka FKJGP West Khasi Hill District hapoh ka jingïalam jong u Bah Chandra Nongdkhar President bad Bah Williston W.Syiem GS ka FKJGP, ki la leit ban ïakynduh ban pan jingshai na ka DSO Nongstoiñ, ba na kaei ka daw halor ka jingbym ïoh Artificial Turf hapoh ka District.
Na ka liang ka DSO ka la pynshai ba na ka liang ki jaka ki lah bit lah biang lada ka sorkar ka shna bad ka daw ka dei ba kam pat don ka jingbhah kyrpang ha kine ki por ba lah dep. Hynrei na ka liang ka officer ka la ïathuh ba mynta ka lah dep phah ïa ka Proposal ïa u Synthetic Tracks ha Nongpathar Pyndengrei.
Ha kaba ïadei bad ki jaka kata ka NDSA Playground bad ka Nongpathar Playground, ki lah dei kiba la biang bha ban shna ïa u Artificial turf hapoh ka ka District. Kumba ka long kine ki madan haba ki lah biang, ka seng ka khmih lynti ba ka sorkar kan shimkhia.
Na ka liang ka Federation ka kyntu ïa ka Sorkar ba ka dei ban shimkhia halor ki mat ba la dep wanrah da ka DSO, khnang ba ki khun samla ka dong ka thaiñ kin ïoh mad lem kum ba ïoh kiwei pat ki samla ha kiwei ki District jong ka jylla. Ka seng kan shimkhia halor kane ka bynta kan sa leit ban ïakynduh ïa ka Directorate of Sports and Youth Affairs bad sha u Sports Minister.
