Ka jingbym donkam donjam ka jingeh ba khraw ha ka District bad Jylla: Hema Nayak

Nongstoiñ, Rymphang 18: Haba kren kum ka kongsan ha ka lympung ba ar sngi jong ka tnad District Commerce and Industries Centre Nongstoiñ, ka Smt Hema Nayak IAS, Deputy Commissioner ka West Khasi Hills District, ka la ong ba ka jingbym don kam don jam ka long kawei na ki jingeh kiba khraw ha ka Jylla bad ha ka District, ha kaba wat ki samla kiba la nang la stad ruh ki aplai ïa ki kam kiba sha trai ka kyrdan pule jong ki.
Ka la ban jur ba ka thong jong ka District Administration bad kiwei pat ki tnad sorkar, ka dei ban pynkylla ïa ka jingmut jingpyrkhat ban shu ap tang ïa ki kam sorkar. Hynrei ban pynshlur bad pynkhlaiñ mynsiem ïa ki samla ban shim ïa ka kam seng kam lajong bad kam khaïi pateng.
Ka la ai jingïaroh ïa ka thong ban pynpoi ïa ki mar sha kiwei ki Jylla bad wat sha ki ri shabar. Ka la ban jur ruh ïa ka jingdonkam ban pynkhlaiñ ïa ka ïew shnong da kaba pynmih ïa ki mar kiba don jingdawa bha ha ka District hi.
Shuh shuh, ka la kdew kum ka nuksa ïa ka Jaiñ sem bad ka Dakmanda kiba bun sien la wanrah na shabar ka Jylla, kaba ktah ïa ka jingïoh kam ïoh jam ki nongshong shnong bad ka ktah ruh ïa ka ïoh ka kot.
Na ka liang jong ka, ka la kyntu ïa ki nongkhaïi pateng napoh ka district ban shim ïa kane ka kabu da kaba sdang shna hi ïa kine ki mar hapoh ka District. Ban pynduna ïa ka dor bad ban pynbha ïa ka ki mar, khnang ba ka jingdawa bad jingïadie kan nang kiew.
Ka la kdew ruh ïa ka nuksa jong u sohtrun na Ri Bhoi u ba la ïoh jingithuh ha ki ïew Europe kiba la pyndonkam ïa u kum u jingbam na ka bynta ki khunlung. Ki nongseng kam jong ka district ki dei ban shim nuksa na kane bad ki dei ban da ïoh jingithuh ban pynithuh bad pynshisha ïa ki mar ha ki ïew bapher bapher.
Ka la ong ba ki nongkhaïi pateng ka West Khasi Hills ki dei ban ïatreilang kum ki Cooperative Societies, khnang ban ïoh jingkyrshan ha ka liang ka pisa kiwei kiwei bad ki dei ruh ban shim kabu na ki rynsan ïarap seng kam lajong jong ka Sorkar Jylla ka PRIME Meghalaya, ban ïoh jingïarap ha ka lïang ka baiseng, jingïalam lynti bad jingïashim bynta ha ki prokram ai jinghikai.
Ha kane ka lympung ba ar sngi jong ka District Level Industrial Exhibition, ki la don baroh 40 tylli ki stall kiba la buh da ki nongkhaïi pateng na West Khasi Hills District, East Khasi Hills, Ri Bhoi, Eastern West Khasi Hills bad South West Khasi Hills, kiba pyni bad die ïa shibun jait ki mar kiba la shna hi napoh kine District.
Kiwei kiwei kiba la donlang ha ka jingïalang plie ki long ka kong I. Wahlang General Manager DCIC Nongstoiñ, Bah B.F. Sun Functional Manager DCIC, lem bad kiwei pat ki ophisar. Ïa kane ka prokram yn pynkut ha ka 19 tarik u Rymphang 2026.