Shillong, Ïaïong 12: Ka jingbthah u Myntri korbar ri ka ri India bad ka jingpdiang ki Myntri Rangbah ki jylla ka thaiñ Shatei lammihngi jong ka ri India ban pynlong Compulsory Subject ïa ka Ktiem Hindi haduh Class X ha ki skul ka paw ba ka ïatyngkhuh bad ka National Education Policy(NEP) jong ka ri.
Katkum ka NEP 2020 ba la nang pynbha shuh shuh ha u 2021, la ong ba ka jinghikai ha ki skul kadei ban long ha ka ktien la jong haduh Class V. Hynrei kan kham biang ban shim haduh Class VIII ne shaneng ruh.
Ïa kane ka kyndon jong ka NEP dei ban bud lang da ki skul paidbah bad ki skul shimet ruh. Nangta la ong ruh ba ki kot kiba bha dei ban pynmih ha ka ktien la jong, kaba mut ka ktien ba ki paidbah ki nang ban kren bha.
Kawei ka kyndon ka ong ruh ba “Baroh ki jait ktien dei ban hikai ha ka rukom ba ki khynnah ki sngewtynnad bad nang bha ban ïaphylliew jingmut”.
Shuh shuh ha ki kyndon ba ïadei bad ki Ktien, ka NEP ka ong ba dei ban pyndonkam lai tylli ki ktien bad kine ki lai tylli ki ktien kin long katkum ka jingjied ki jylla, ki khynnah skul. Hynrei ka kdew ruh ba artylli na ki, ki dei ban long ki ktien trai ri jong ka India.
Lyngba kine ki kyndon jong ka NEP ka paw ba kam don kano kano ka jingbthah ba hap pynlong Compulsory Subject ïa ka Hindi. Nangta ha ri India ka English ka la dei lypa ka Offocial Language ne ka ktien ba pyndonkam haba thoh ba tar ha ki ophis sorkar ruh. Ha Meghalaya ka Official Language kadei ka English bad ka Khasi kadei ka Associate Official Language.
Ka NEP ka ong ba shah ban hikai ha ki lai tylli ki ktien bad ka English bad Khasi ne Garo kidei ki ktien ba ki khynnah skul ki nang bad suk bha ban pule bad thoh. Mynta da ka jingbuh ba hap ban shim beit ïa ka ktien Hindi haduh Class X, kan buh jingeh shibun ïa ki khynnah skul. Nangta ruh kan buh jingeh namar ba ym lah ban ïoh Nonghikai ban hikai ha kane ka Subject.
Lah ban kdew hangne ba hadien ka jingpdiang jong ki Myntri Rangbah ki jylla ka thaiñ Shatei Lammihngi ban pynlong Compulsory Subject ïa ka Hindi ha ki Skul, la mih ka jingpyrshah kaba jur na ki Political Party ba ki Seng ha kane ka jylla.
U President ka Meghalaya Pradesh Congress Committee (MPCC) u Bah Vincent Pala, u la pynpaw ka jingpyrshah kaba jur ïa kane ka rai bad na ka liang jong u, u la ong ba un sa ai da ka jingthoh sha u Myntri Rangbah Duh jong ka ri India, u Narendra Modi ban pynpaw ka jingbym ïahap ïa kane.
Na ka liang ka Voice of the People Party (VPP) ruh lyngba u Bah Ardent Basaïawmoit, ka la pynpaw ka jingpyrshah kaba jur halor kane, namar ba ka Subject Hindi ka long kaba eh bha ban nang ban pule. Ka VPP ka kynnoh ruh ba kane kadei ka buit jong ka BJP ban pynlong ïa ka ri India kaba kren beit tang kawei ka ktien ha ka ri baroh kawei.
Kumjuh ruh ka Pynursla Block-level Committee jong ka seng Trinamool Congress (TMC) haka kyrwoh sha ki lad pathai khubor kaba lah pyllait da ka tnad pathai khubor (Communications cell) ka pynpaw ïaka jingpyrshah jur halor ka jingthmu jong ka Sorkar Pdeng ban pynbor ïaka ktien Hindi ha ki skul hapoh ka Jylla watla ka tnad pule puthi jong ka sorkar Jylla ka dang ïai ap ïaka jingpyntip ba thikna. Ka Block Committee ka TMC lyngba ka kyrwoh ba lah phah da u Block President Babu Jiten Khongwieng ka ong ba kane ka rukom pyrshang ban pynbsuh ïaka ktien Hindi haka Jylla ka long kaei kaei ka bym lah pdiang khlem da sngewthuh bad pynshong nongrim ïaki jingeh ba kynduh ki khynnah pule, ban ïa kren lei lei ïaki nonghikai ka kham palat shuh.
Ka Seng ka kyntu ïa ka sorkar Jylla kaba ïalam daka NPP ha ryngkat ka BJP lem bad kiwei kiwei ki seng riewlum ba kin pynpaw lem ïaka jing bym mynjur jong kiba bun ba lang halor ka jingtip naka Sorkar Pdeng, namar ba ka long kaei kaei kaba yn sa shem shitom bha haki skul bapher bapher khamtam eh sha ki thain nongkyndong namar wat ki subjek ba mynta ruh dang duna kiba nonghikai ba tbit ban hikai, kumjuh ruh halor ka jing bym biang ki skul. U la batai ruh ba wat ïaka tulop ki nonghikai ba bun dang sah teng ban siew da kaba wanrah sa kita ki nonghikai Hindi katno kan long kaba eh ban pynbiang. Une u nongïalam uba lah long teng u nonghikai skul mynshwa, u ong “Ka kynti mynta ka dei ba ngin ialeh shitom ban ioh pynrung iaka kyntien Khasi bad Garo haka Eight Schedule haka Riti Synshar ka Ri”.
