Khliehriat, Jylliew, 30 : Ka Corporate Social Responsibility (CSR) jong ka Star Cement Lumshnong ha ka sngi saitjaiñ ka la pynlong ïa ka prokram Cancer Awareness bad ka Cancer Screen Camp ha Lumshnong Community Hall, East Jaiñtia Hills District ha kaba ki doctor kiba na North East Cancer Hospital and Resesrch Institute Jorabat, Assam ki la wan ban pyniaid ïa kane ka awareness bad leh ïa ki screening check up bad ki la don haduh 221 ngut ki nongshong shnong kiba na Lumshnong bad na Birchyrnot kiba la wan sha kane ka Screening Camp.
Kane ka Cancer Screening Camp ka dei ka ba leh screening ïa ka Brest Cancer, Oral Cancer, Head bad Neck Cancer.
Kum ka jingpynshai sha ki paidbah ha kaba ïadei bad ka jingpang cancer, na ka liang u Dr M.N Baruah uba dei u doctor uba heh jong ka North East Cancer Hospital and Resesrch Institute Jorabat Assam u la ong ba lada shu shim kyllum, na ka shispah ngut kiba pang cancer, arphew ngut ki dei tang na ka jylla Meghalaya kiba ju wan shah sumar ha North East Cancer Hospital and Resesrch Institute Jorabat man la u snem bad halor kane u la ong ba lehse kane ka lah ban long dei na ka daw ka jingduna ki awareness prokram bad kiba pang cancer ki poi shaduh ka stage Four ne last stage, u la ong ruh ba ka jingpang cancer ka jyllei bha ha ka thaiñ shatei lam mihngi kum ha Meghalaya bad Assam, ka daw ka dei na ka rukom bam rukom dih, kum kaba bam kwai, bam duma, kaba dih sikret bad kaba dih kyiad.
“Na ka 100 percent kiba pang cancer ha ka ri, 35 percent dei na ka daw ka jingbam kwai bad duma, 20 percent na ka daw ka jingdih kyiad, 15 percent pat dei na ka daw ka jingmlien ban bam ïa ki jait jingbam ba sniew, kumta lah ban ong ba 75 percent lah ban ïada ban lait na ka jingpang cancer kata lada ki briew ki sangeh noh ban bam kwai, bam duma, dih kyiad bad bam ïa ki jingbam kiba sniew,” u la ong.
U la ong ba wat ka HIV/AIDS ruh ka lah ban thaw jingpang cancer bad kane ka jingpang ka lah ruh ban dei na ka jingiabit na kiwei pat kaba wanrah jingpang cancer ha u briew “Lada ngi tip naei ka jingpang ka wan lah ban ïada bad donkam ban shimkhia ban lait na ka jingpang cancer namar naduh u snem 1951 uwei u British Medical Juournal uba la ong ba u duma u thaw jingpang cancer halor kane ka jingtip ngi la dei ban long husiar, hynrei ki briew ki dang bam ïa u kwai, ïa u duma, ïa ka kyiad, kumta ka imlang ka sahlang ka la dei ban sngewthuh noh kumno ban tehlakam ban lait bad ban ïada na ka jingpang cancer” ong u Dr M.N Baruah.
U la ong ruh ba haduh 75 percent ki briew ha Meghalaya bad ha Assam ki dei kiba bam kwai, bam duma, dih kyiad, u kyntu ba dei bankiar noh na ki jingbam jingdih kiba sniew namar kine ki wanrah bad thaw jingpang oral cancer bad cancer ha u ryndang, cancer ha ka kpoh.
U Dr M.N Baruah u la ai khublei ia ka tnat CSR jong ka company Star Cement Lumshnong kaba la pynlong ïa kaba kum kane ka Camp bad ka awareness ne jingpynshai paidbah kaba long kaba donkam bha ba ki paidbah kin tip ban sngewthuh kumno ban lait bad ban ïada na ka jingpang cancer, u kyrpad ïa ka CSR jong ka Star Cement ba kan pynlong shuh shuh ïa kaba kum kane ka camp ha kiwei kiwei ki shnong ruh khnang ba kan long ka jingmyntoi ïa ka imlang ka sahlang ba ki paidbah kin ïoh jingpynshai shaphang ka jingpang cancer bad kumno ban ïada ban lait na kane ka jingpang.
Kumjuh ruh u Medical Officer jong ka Star Cement Lumshnong, u Dr Sanjib Deka, u la kubur ba ka jingbam kwai, bam duma, dih kyiad ki dei kiba thaw ïa ka jingpang cancer, u la ong ba ha ka thaiñ shatei lam mihngi ka jyllei ka jingpang cancer na ka daw ka rukom bam rukom dih, kumta ban ïada na kane ka jingpang donkam ban pynsngewthuh bad ai jingpynshai sha ki paidbah ba ki dei ban kiar na kaba bam kwai, bam duma bad dih kyiad .
Kiba la don lang ha kane ka Screening Camp/Awareness prokram ki kynthup ruh u Senior General Manager jong ka Star Cement uba dei ruh u Retired Air Marshal, Indian Air Force, u R.V. Ramkishore lem bad u Dr Rahul Das, Dr Anukampa Baruah, kiba na North East Cancer Hospital Jorabat Hospital lem abd u Dr N.Phyllei ba na Lumshnong PCH.
